خوږو او محترمو اِسلامي وروڼو! دا دے د صحابۀ کرامو عَلَیْہِمُ الرِّضْوان ايمان۔۔۔!! زمونږه به هٰغه ايمان قبليږي، کله چې مونږه د صحابۀ کرامو عَلَیْہِمُ الرِّضْوان پۀ شان ايمان قبول کړو، ځکه مونږ له پکار دي چې مونږه پۀ الله پاک باندې، د هغۀ پۀ خوږ محبوب صَلَّى اللهُ عَلَيْهِ وَاٰلِهٖ وَسَلَّم باندې، د الله او د رسول صَلَّى اللهُ عَلَيْهِ وَاٰلِهٖ وَسَلَّم پۀ ارشاداتو باندې هم داسې پوخ يقين وساتو، لکه څنګه چې پوخ يقين صحابۀ کرامو عَلَیْہِمُ الرِّضْوان لرلو۔

(2): صحابۀ کرام عَلَیْہِمُ الرِّضْوان او پۀ خوږ مصطفےٰ صَلَّى اللهُ عَلَيْهِ وَاٰلِهٖ وَسَلَّم باندې د شفاعت يقين

پۀ قرآنِ کريم کښې يو سُورت دے: سُورۀ مُنَافِقُون۔ پۀ دې مبارک سُورت کښې هم د منافقانو کارنامې بيان شوې دي، پۀ سُورۀ مُنَافِقُون کښې الله پاک د منافقانو يو عيب دا هم بيان کړے دے چې

وَ  اِذَا  قِیْلَ  لَہُمْ  تَعَالَوْا 

(پارہ:28 ، سور ۂ  منافقون:5)

ترجمهٴ کنزُ العِرفان: او چې کله هغوئي ته ووئيلے شي چې راشئ 

چرته راشئ۔۔۔؟ بارګاهِ رسالت صَلَّى اللهُ عَلَيْهِ وَاٰلِهٖ وَسَلَّم ته۔ ولې راشئ۔۔۔؟ د پاره د دې چې

یَسْتَغْفِرْ لَکُمْ رَسُوْلُ  اللّٰہِ 

(پارہ:28 ، سورۂ منافقون:5)

ترجمهٴ کنزُ العِرفان: چې د الله رسول ستاسو د پاره بخښنه وغواړي۔

بے شکه چې د ګناهونو معافي هم د الله پاک د بارګاه نه ميلاؤيږي خو ميلاؤيږي د خوږ مصطفٰے (صَلَّى اللهُ عَلَيْهِ وَاٰلِهٖ وَسَلَّم) پۀ شفاعت باندې، منافقانو ته وئيلے کيږي چې اے منافقانو! راشئ! زما د خوږ محبوب صَلَّى اللهُ عَلَيْهِ وَاٰلِهٖ وَسَلَّم د رحمت د لمنې طرف ته راشئ، هغۀ رَحمةٌ لِّلعَالَمِين دے، ستاسو شفاعت به وکړي، ستاسو د پاره به د بخښنې دُعا وکړي، د دې پۀ برکت باندې به الله پاک ستاسو ګناهونه اوبخښي۔ بيا دا څومره زبردسته موقع وه، چې منافقان راغلے وے، د خوږ مصطفٰے صَلَّى اللهُ عَلَيْهِ وَاٰلِهٖ وَسَلَّم د رحمت پۀ لمن کښې يـې پناه اخستې وے نو د خوږ مصطفٰے صَلَّى اللهُ عَلَيْهِ وَاٰلِهٖ وَسَلَّم د شفاعت حصه دار به جوړ شوي وو،