پھر یہ دیکھئے ! کہ انہیں اس سخاوت پر اُبھارا کس چیز نے ؟ کیا یہ مَعَاذَ اللہ ! شہرت چاہتے تھے ، لوگوں کے دِل میں اپنی محبّت ، اپنا مقام بڑھانا چاہتے تھے ، اپنی تعریفوں کے خواہش مند تھے ؟ نہیں... ! ہر گز نہیں... !  !  اللہ پاک نے فرمایا :

عَلٰى حُبِّهٖ   ( پارہ : 29 ، سورۂ دھر : 8 )

ترجمہ کَنْزُ الایمان : اس کی محبت پر ۔

مولا علی رَضِیَ اللہ عنہ کے گھرانے والے ، یہ پاک لوگ 3 دن خود پانی سے اِفطار کر کے مسکین ، یتیم اور قیدی کو کھانا دے رہے تھے ، اس کا سبب کیا تھا ؟ اللہ پاک کی محبّت... !  !  یہ ایسی شاندار سخاوت اللہ پاک کی محبّت میں ، اس کی رضا کے حصول کے لئے کر رہے تھے۔

سُبْحٰنَ اللہ ! اسے کہتے ہیں : سخاوت... !  !  یہ ہوتا ہے اِیْثار... !  !  ہم لوگ اَوَّل تو سخاوت کرتے ہی کب ہیں ؟ اگر کرتے بھی ہیں تو پہلے اپنی ضروریات پُوری کرتے ہیں ، پھر دوسروں کی طرف دھیان جاتا ہے ، پھر جب دوسروں کو دیتے بھی ہیں تو ریاکاری ، دکھلاوا ، خودپسندی اور نجانے کیسی کیسی باطنی بیماریاں ہمیں گھیر لیتی ہیں۔ کاش ! گھرانۂ حیدر کا صدقہ اللہ پاک ہمیں اِخْلاص سے بھرپُور سخاوت کی توفیق عطا فرمائے۔

ایثار کی زبردست فضیلت

یاد رکھئے ! اپنی حاجت ، اپنی ضرورت پر دوسروں کی ضرورت کو ترجیح دینے کا نام ہی اِیْثار ہے اور اِیْثار سخاوت کی اعلیٰ ترین صُورت ہوتی ہے۔اللہ پاک کے آخری نبی ، رسولِ ہاشمی  صَلَّی اللہ عَلَیْہِ وَ آلِہٖ وَ سَلَّم نے فرمایا : جو شخص کسی چیز کی خواہش رکھتا ہو ،  پھر اُس خواہش کو روک کر  اپنے اوپر  ( دوسرے کو )   ترجیح   دے ،  تو اللہ پاک اُسے بخش دیتا ہے۔^{(  [1] )}