یہ ہر وقت فِکْرِ آخرت میں مَصْرُوف رہتے تھے ، دیکھئے! حضرت حبیب عجمی  رَحمۃُ اللہِ عَلَیْہ  اِمام حَسَن بَصَری  رَحمۃُ اللہِ عَلَیْہ  کے شاگرد ہیں ، حقیقت میں حضرت حبیب عجمی  رَحمۃُ اللہِ عَلَیْہ  کو بلند رُتبہ ملنا امام حَسَن بصری  رَحمۃُ اللہِ عَلَیْہ  کا ہی فیضان تھا ، اِس کے باوُجُود آپ حضرت حبیب عجمی  رَحمۃُ اللہِ عَلَیْہ  کو دیکھ کراِتْرائے نہیں بلکہ عاجزی فرمائی۔ خیال رہے! امام حَسَن بَصَری  رَحمۃُ اللہِ عَلَیْہ  خود بھی باکرامت وَلِیُّ اللہ ہیں ، ایک روز دیکھا گیا : آپ  رَحمۃُ اللہِ عَلَیْہ  نماز پڑھنے کے لئے پانی پَر جائے نماز بچھا رہے تھے ، ایک مرتبہ سَفَرِ حَجّ کے دوران آپ نے اَہْلِ قافلہ کو کھجوریں عطا فرمائیں ، اَہْلِ قافلہ نے کھجوریں کھائیں ، اَندر سے جو گٹھلیاں نکلیں وہ سونے کی تھیں۔ ^([1])

سُبْحٰنَ اللہ! سُبْحٰنَ اللہ! اے عاشقانِ رسول! اندازہ کیجئے! ایسے بلند رُتبہ ہونے کے باوُجُود امامِ حَسَن بَصَری  رَحمۃُ اللہِ عَلَیْہ  نے حضرت حبیب عجمی  رَحمۃُ اللہِ عَلَیْہ  کو پانی پر چلتے دیکھا تو کیسے فِکْرِ آخرت اپنائی ، پُل صِرَاط کے تَصَوُّر میں ڈُوب کر خوف ِ خُدا سے کانپ گئے اور عاجزی وانکساری کرتے ہوئے اپنی اِصْلاح کے لئے فِکْر مند ہو گئے۔ آہ! ایک ہم ہیں کہ گُنَاہوں کا میٹر دِن رات تیزی کے ساتھ چلتا چلا جا رہا ہے ، چلتا چلا جا رہا ہے ، اس کے باوُجُود نہ اِحْسَاسِ  ندامت ہے ، نہ خوفِ آخرت۔

عُمر بَدیوں میں ساری گزاری                            ہائے پھر بھی نہیں شَرْمساری

بخش!محبوب کا واسطہ ہے                                یاخُدا تجھ سے میری دُعا ہے

ہُوں بظاہر بڑا نیک صُورت                             کر بھی دے مجھ کو اب نیک سیرت

ظاہِر اچھا ہے ، باطِن بُرا ہے                            یاخُدا تجھ سے میری دُعا ہے

مَغْفِرت کا ہوں تجھ سے سُوالی                          پھیرنا اپنے دَر سے نہ خالی