شَفاعت پانے کا ایک بہترین ذَریعہ

اے عاشقانِ رَسُول!اللہ پاک کے آخری نبی ، مکی مَدَنیصَلَّی اللّٰہُ عَلَیْہِ وَاٰلہٖ وَسَلَّم کی شَفاعت پانے کا ایک بہترین ذَریعہ دُرُودِ پا ک کی کثرت بھی ہے ، یعنی بہت سارے دُرُودِ پاک پڑھنا یہ بھی شَفاعت کا بہترین ذَریعہ ہے ۔ اَلْحَمْدُ لِلّٰہ نیک بننے کا طریقہ بنام “ نیک اعمال “ کے رِسالے میں بھی روزانہ کم از کم 313بار دُرُودِ پا ک پڑھنے کی ترغیب موجود ہے ، کیا ہی اچھا ہو کہ ہم جس بارہویں والے آقا صَلَّی اللّٰہُ عَلَیْہِ وَاٰلہٖ وَسَلَّم کا جَشنِ وِلادت منا رہے ہیں ، اُن پر روزانہ کم ازکم 313 بار  دُرُودِ پاک پڑھنے کی  عادت بنا لیں۔ آئیے! شَفاعت کی خیرات مانگتے ہوئے ہم اپنے بارہویں والے آقا و مولیٰ صَلَّی اللّٰہُ عَلَیْہِ وَاٰلہٖ وَسَلَّم پر یہ دُرُودِ شفاعت پڑھتے ہیں ، اللہ پاک ہمیں اپنے حبیب صَلَّی اللّٰہُ عَلَیْہِ وَاٰلہٖ وَسَلَّم کی شَفاعت سے محروم نہ فرمائے : “ اَللّٰھُمَّ صَلِّ عَلٰی مُحَمَّدٍ وَّاَنْزِلْہُ الْمَقْعَدَ الْمُقَرَّبَ عِنْدَکَ یَوْمَ الْقِیَامَۃِ   ‘‘^[1]

گر لبِ پاک سے اِقرارِ شَفاعت ہو جائے            یوں     نہ بے چین رکھے جوشِشِ عِصیاں     ہم کو

نَیّرِ حَشر نے اِک آگ لگا رکھی ہے!                     تیز ہے دھوپ ملے سایۂ داماں ہم کو^[2]

صَلُّوْا عَلَی الْحَبِیْب!                                                                  صَلَّی اللہُ عَلٰی مُحَمَّد