نَجْم ہیں اور ناؤ ہے عِتْرت رَسُولُاللہ کی

(حدائق بخشش، ص۱۵۳)

صَلُّو ْا عَلَی الْحَبِیْب!                                  صَلَّی اللہُ عَلٰی مُحَمَّد

      اے عاشقانِ رسول اسلامی بہنو!ہم امامِ اعظم ابو حنیفہرَحْمَۃُ اللہِ عَلَیْہ کی ذہانت کے واقعات سے مُتَعلِّق سن ر ہی تھیں۔ آئیے! سب سے پہلے ان کی سیرت و کردار سے متعلق کچھ  سنتی ہیں:

امامِ اعظم رَحْمَۃُ اللہِ عَلَیْہ کامختصر تعارف:

حضرت سیدنا امامِ اعظم رَحْمَۃُ اللہِ عَلَیْہ کا نامِ نامی  نُعمان ہے، حضرت سیدنا امامِ اعظم رَحْمَۃُ اللہِ عَلَیْہ  کے  والِدِ گرامی کا نام ثابِت ہے اور آپ کی کُنْیَت ابُو حنیفہ (اور لَقب امام ِاَعْظم ہے)۔ شیخِ طریقت،اَمِیرِ اہلسنّت،بانیِ دعوتِ اسلامی حضرت ِ علّامہ مَولانا ابو بلا ل محمد الیاس عطّار قادِری  رَضَوِی ضِیائی اپنے رسالے اشکوں کی برسات میں لکھتے ہیں: حضرت سیدنا امامِ اعظم رَحْمَۃُ اللہِ عَلَیْہ 70 ہجری میں عراق کے مشہور شہر کوفے میں پیدا ہوئے اور 80 سال کی عمر میں 2 شعبان المعظم 150 ہجری میں وفات پائی۔ (اشکوں کی برسات، ص۲) آج بھی بغدادشریف کے قبرستان خیزران میں آپ کا مزارِ فائضُ الاَنْوار مَرجَعِ خَلائِق ہے۔( تاریخِ بغداد ،۱۳/۳۲۵ مفہوماً) حضرت سیدنا امامِ اعظم رَحْمَۃُ اللہِ عَلَیْہ  نے چندصَحابَۂ کِرام عَلَیْہِمُ الرِّضْوَان  سے مُلاقات کا شَرَف حاصل کیا ہے اوربعض صَحابَۂ کرام عَلَیْہِمُ الرِّضْوَان سے براہِ راست پیارے پیارے آقا، میٹھے میٹھے مصطفےٰ صَلَّی اللّٰہُ عَلَیْہِ واٰلِہٖ وَسَلَّمَ کے اِرْشادات بھی سُنے ہیں۔ (الخیرات  الحسان، ص:۳۳ ملتقطاً)

ہو نائبِ سَروَرِ دو عالم، امامِ اعظم ابوحنیفہ

سراجِ اُمّت فقیہِ اَفخم، امامِ اعظم ابوحنیفہ