Ya Khuda Meri Maghfirat Farma

یا خدا میری مغفرت فرما

یا خدا میری مغفرت فرما

باغِ فِردوس مَرْحَمَت فرما

تُو گناہوں کو کر مُعاف اللہ

میری مقبول مَعذِرت فرما

مُصطفٰے کا وسیلہ توبہ پر

تُو عِنایت مُدَاوَمت فرما

موت ایماں پہ دے مدینے میں

اور مَحمود عاقِبت فرما

سرفراز اور سُرخرو مولیٰ

مجھ کو تُو روزِ آخرت فرما

مشکلوں میں مرے خدا میری

ہر قدم پر مُعاوَنت فرما

ہو نہ عطّارؔ حشر میں رُسوا

بے حساب اس کی مغفرت فرما

وسائلِ بخشش (مُرَمَّم)،ص75

از شیخِ طریقت امیرِ اہلِ سنت دَامَتْ بَرَکاتُہُمُ الْعَالِیَہ

اے شَہَنشاہِ مدینہ اَلصَّلٰوۃُ وَالسَّلَام

اے شَہَنشاہِ مدینہ اَلصَّلٰوۃُ وَالسَّلَام

زینتِ عرشِ مُعَلّٰی اَلصَّلٰوۃُ وَالسَّلَام

رَبِّ ہَبْ لِیْ اُمَّتِیْ کہتے ہوئے پیدا ہوئے

حق نے فرمایا کہ بخشا اَلصَّلٰوۃُ وَالسَّلَام

دست بستہ سب فِرِشتے پڑھتے ہیں اُن پر دُرُود

کیوں نہ ہو پھر وِرد اپنا اَلصَّلٰوۃُ وَالسَّلَام

مومنوں پڑھتے نہیں کیوں اپنے آقا پر دُرُود

ہے فِرِشتوں کا وظیفہ اَلصَّلٰوۃُ وَالسَّلَام

بُت شِکَن آیا یہ کہہ کر سر کے بل بُت گِر گئے

جُھوم کر کہتا تھا کعبہ اَلصَّلٰوۃُ وَالسَّلَام

سر جُھکا کر با ادب عشقِ رسول اللہ میں

کہہ رہا تھا ہر ستارہ اَلصَّلٰوۃُ وَالسَّلَام

میں وہ سنّی ہوں جمیلِؔ قادری مرنے کے بعد

میرا لاشہ بھی کہے گا اَلصَّلٰوۃُ وَالسَّلَام

قبالۂ بخشش،ص95

از مدّاحُ الحبیب مولانا جمیل الرحمٰن قادری رضوی عَلَیْہِ رَحمَۃُ اللّٰہ ِ الْقَوِی

باغِ جنّت کے ہیں بہرِ مَدْح خوانِ اہلِ بیت

باغِ جنّت کے ہیں بہرِ مَدْح خوانِ اہلِ بیت

تم کو مژدہ نار کا اے دشمنانِ اہلِ بیت

کس زباں سے ہو بیان مدح و شانِ اہلِ بیت

مَدْح گوئے مصطفٰے ہے مَدْح خوانِ اہلِ بیت

ان کے گھر میں بے اجازت جبرئیل آتے نہیں

قدر والے جانتے ہیں قدر و شانِ اہلِ بیت

جمعہ کا دن ہے کتابیں زِیست کی طے کرکے آج

کھیلتے ہیں جان پر شہزادگانِ اہلِ بیت

کس شقی کی ہے حکومت ہائے کیا اندھیر ہے

دن دہاڑے لُٹ رہا ہے کاروانِ اہلِ بیت

گھر لُٹانا جان دینا کوئی تجھ سے سیکھ جائے

جانِ عالَم ہو فِدا اے خاندانِ اہلِ بیت

بے ادب گستاخ فرقہ کو سُنادے اے حسنؔ

یوں کہا کرتے ہیں سنّی داستانِ اہلِ بیت

ذوقِ نعت،ص71

از برادرِ اعلیٰ حضرت مولانا حسن رضا خان عَلَیْہِ رَحمَۃُ الرَّحْمٰن