( 1 ) : نَماز بہترین مدد گار ہے

ہر مشکل ، پریشانی ، تنگدستی ، بےروزگاری ، غرض ہر طرح کی مشکلات میں نَماز بہترین مددگار ہے۔ اللہ پاک قرآنِ کریم میں فرماتا ہے :

وَ اسْتَعِیْنُوْا بِالصَّبْرِ وَ الصَّلٰوةِؕ-   ( پارہ : 1 ، سورۂ بقرہ : 45 )

ترجمہ کَنْزُ الایمان : اور صبر اور نَماز سے مدد چاہو۔

سُبْحٰنَ اللہ ! معلوم ہوا؛ ہمیں کوئی مشکل آئے ، کسی قسم کی کوئی پریشانی ہو ، ہم نَماز پڑھیں ، اس کے ذریعے سے مدد چاہیں تو اِنْ شَآءَ اللہ الْکَرِیْم ! غیب سے مدد ہو گی اور پریشانی دُور ہو جائے گی۔

جب بارگاہِ رسالت میں بھوک کی حاضِری ہوتی

مشہور مفسرِ قرآن ، حکیم الاُمَّت مفتی احمد یار خان نعیمی  رَحمۃُ اللہ علیہ اس آیتِ کریمہ کے تحت فرماتے ہیں : نَماز انسان کو دنیا سے بے خبر کر کے اللہ  پاک کی طرف متوجِّہ کر دیتی ہے اس لئے اس کی برکت سے دنیا کی مشکلیں دل سے فراموش  ہو ( یعنی بھلا دی  ) جاتی ہیں ۔  ( صاحِبِ )  تفسیر عزیزی نے اس جگہ بیان فرمایا کہ نبیِّ کریم صَلَّی اللہ عَلَیْہِ وَ آلِہٖ وَ سَلَّم کے گھر میں فاقہ ہوتا تھا اور رات میں کچھ ملاحظہ نہ فرماتے  ( یعنی کچھ نہ کھاتے  ) تھے ، اس دوران جب بھوک غلبہ کرتی تو نبیِّ  کریم صَلَّی اللہ عَلَیْہِ وَ آلِہٖ وَ سَلَّم مسجد میں تشریف لا کر نَماز میں مشغول ہو جایا کرتے تھے۔ ^{( [1] )}