(صراط الجنان ،ج۵،ص۲۹۲)اسی لئےہمیں چاہیے کہ ہم اللہ  پاک کی ہر نعمت پر اس کا شکر ادا کریں اوراس کی نافرمانی سے بچیں  کیونکہ نعمت پر شکر اَدا کرنے سے نعمتوں میں مزید اضافہ ہوتا ہے،جیساکہ حضرت  عُطارِد قُرَشی  رَضِیَ اللہ  عَنْہ سے مَروِی ہے کہ حُضورِ اکرم نُورِمُجسم   صَلَّی اللہ  عَلَیْہِ وَاٰلِہٖ وَسَلَّم  نے ارشاد فرمایا : اللہ  پاک اپنے بندے کو شکر کی توفیق عطا فرماتا ہے تو پھر اسے نعمت کے اضافے سے محروم نہیں فرماتا کیونکہ اس کا فرمانِ عالی شان ہے۔

لَىٕنْ شَكَرْتُمْ لَاَزِیْدَنَّكُمْ  (پ۱۳،ابراہیم : ۷)

ترجمہ ٔ کنز العرفان   : اگر تم میرا شکر ادا کرو   گے تو میں تمہیں اور زیادہ عطا کروں گا۔

(شُعبُ الایمان ،للبیھقی،باب فی تعدید نعم اللہ،الحدیث : ۴۵۲۶،ج۴ص۱۲۴)

حضرت علی بن صَالِح  رَحْمَۃُ اللہ  عَلَیْہ فرماتے ہیں  : ’’اس (آیت)سے مراد یہ ہے کہ اگر تم اطاعت وعبادت سے میرا شکر ادا کرو گے تو میں نعمتوں میں اضافہ کردُوں گا‘‘                         (تفسیر ِطبری،پ۱۳،ابراہیم،تحت الایۃ۷،الحدیث : ۲۰۵۸۵،ج۷،ص۴۲۰)

شُکر کی حقیقت

 پیارے پیارے اسلامی بھائیو ! شکر کی حقیقت یہ ہے کہ نعمت دینے والے کی نعمت کااس کی تعظیم کے ساتھ اعتراف کرےاور نفس کو اس چیز کا عادی بنائے ۔ یہاں ایک مدنی پھول یہ ہے کہ بندہ جب اللہ تعالیٰ کی نعمتوں اور اس کے طرح طرح کے فضل وکرم اور اِحسان کا مطالعہ کرتا ہے تو اس کے شکر میں مشغول ہوتا ہے،اس سے نعمتیں زیادہ ہوتی ہیں اور بندے کے دل میں اللہتعالیٰ کی محبت بڑھتی چلی جاتی ہے یہ مقام بہت برتر ہے اوراس سے اعلی مقام یہ ہے کہ نعمت دینے والے کی محبت یہاں تک غالب ہوجائے کہ دل کا نعمتوں کی طرف میلان باقی نہ رہے ،یہ مَقام صِدِّیقوں کا ہے۔  (صراط الجنان،ج۵،ص۱۵۳،بتغیر قلیل)