Book Name:Nematon ka Shukar Ada Karnay ka Tariqa
صَلُّوْا عَلَی الْحَبِیْب! صَلَّی اللہ عَلٰی مُحَمَّد
فرمانِ مصطفےٰ صَلّی اللہ عَلَیْہ وآلِہ وسَلَّم : اَفْضَلُ الْعَمَلِ اَلنِّيَّۃُ الصَّادِقَۃُ سچی نیت سب سے افضل عمل ہے۔ ([1]) اے عاشقانِ رسول ! ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے ! مثلاً نیت کیجئے ! * عِلْم سیکھنے کے لئے پورا بیان سُنوں گا * با اَدب بیٹھوں گا * دورانِ بیان سُستی سے بچوں گا * اپنی اِصْلاح کے لئے بیان سُنوں گا * جو سُنوں گا دوسروں تک پہنچانے کی کوشش کروں گا۔
صَلُّوْا عَلَی الْحَبِیْب! صَلَّی اللہ عَلٰی مُحَمَّد
حضرت سلمان فارسی رَضِیَ اللہ عَنْہ فرماتے ہیں : ایک شخص کودُنیا کی دولت سے بہت نوازا گیا اور پھر سب کچھ جاتا رہا تو وہ اللہ پاک کی حمد و ثنا کرنے لگا یہاں تک کہ اس کے پاس بچھانے کے لئے صرف ایک چٹائی رہ گئی مگر وہ پھربھی اللہ پاک کی حمد وثنا میں مصروف رہا ۔ ایک دوسرے مالدارشخص نے چٹائی والے سے کہا : ” اب تم کس بات پراللہ پاک کا شکر ادا کرتے ہو ؟ “ اس نے کہا : میں ان نعمتوں پر اللہ پاک کا شکر ادا کرتا ہوں کہ اگرمیں ساری دُنیاکی دولت بھی دے دوں تووہ نعمتیں مجھے نہ ملیں۔ اس نے پوچھا : وہ کیا ؟ جواب دیا : کیاتم اپنی آنکھ ، زبان ، ہاتھوں اور پاؤں کونہیں دیکھتے(کہ یہ بھی اللہ پاک کی کتنی بڑی نعمتیں ہیں) ؟ (شعب الایمان ، ۴/۱۱۲ ، حدیث : ۴۴۶۲)
پیارے پیارے اسلامی بھائیو!اس نصیحت آموز حکایت سےمعلوم ہوا کہ شُکر صرف مال ودولت اور خوشیوں کے مِلنے پر نہیں کیا جاتابلکہ ہر حال میں اللہ پاک کا شکراَدا کرنا چاہیے