صَلُّوْا عَلَی الْحَبِیْب!                                                صَلَّی اللہُ عَلٰی مُحَمّد

فرمانِ مصطفےٰ صَلّی اللہُ عَلَیْہ وآلِہ وسَلَّم : اَفْضَلُ الْعَمَلِ اَلنِّيَّۃُ الصَّادِقَۃُ سچی نیت سب سے افضل عمل ہے۔ ⁽[1]⁾ اے عاشقانِ رسول! ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے! مثلاً نیت کیجئے! * عِلْم سیکھنے کے لئے پورا بیان سُنوں گا  *  با اَدب بیٹھوں گا * دورانِ بیان سُستی سے بچوں گا  * اپنی اِصْلاح کے لئے بیان سُنوں گا  * جو سُنوں گا دوسروں تک پہنچانے  کی کوشش کروں گا۔

صَلُّوْا عَلَی الْحَبِیْب!                                            صَلَّی اللہُ عَلٰی مُحَمَّد

پیارے پیارے اسلامی بھائیو!آج کے اس ہفتہ وار سنتوں بھرے اجتماع میں ہم بڑوں کے اَدب و اِحْترام کے بارے میں سُننے کی سعادت حاصل کریں گے۔ ہمارا پیارا مذہب ، دِینِ اسلام ہمیں اس بات كی تعلیم دیتاہے کہ جو عُمراورمقام ومرتبے میں ہم سے چھوٹے ہیں ، ہم ان  کے ساتھ  شفقت ومَحَبَّت  کا برتاؤ کریں اور جو عُمر ، علم ، عُہدے اور مَنْصَب  میں ہم سے بڑے ہیں ان کا ادب واِحترام بجالائیں ۔ دن بھرمیں  ہمارا  اپنے بڑوں سے کسی نہ کسی وجہ سے  رابطہ ضرور رہتاہے ، ہمارے بڑوں میں ماں باپ ، چچا ، تایا ، خالو ، ماموں ، بڑے بہن بھائی دیگر رشتہ دار ، اَساتذہ ، پیر و مُرشد ، عُلَمَا ومُفتیانِ کرام اورتمام  بلند مرتبے والےلوگ شَامل ہیں۔ ہمیں ان کی تعظیم وتکریم   کرنے کا حکم ہمارے پیارے پیارے آقا ، دوعالَم کے داتا ، مکی مَدَنی مُصْطَفٰے صَلَّی اللہُ عَلَیْہِ واٰلِہٖ وَسَلَّمَ نے ارشاد فرمایا ہے۔ آئیے! اس بارے میں دو(2) فرامينِ مُصْطَفٰے صَلَّی اللہُ عَلَیْہِ واٰلِہٖ وَسَلَّمَ سُنتے ہیں :