دیکھئے ہر ایک یہی کہتا نظر آتا ہے:

سب سے اَولیٰ و اَعلیٰ ہمارا نبی                                        سب سے بالا و وَالا ہمارا نبی

اپنے مولیٰ کا پیارا ہَمارا نبی                                         دونوں عالَم کا دُولہا ہمارا نبی

خَلق سے اَولیا، اَولیا سے رُسُل                                اور رَسولوں  سے اَعلیٰ ہمارا نبی

بُجھ گئیں جس کے آگے سبھی مشعلیں                                شمع وہ لے کر آیا ہمارا نبی

کون دیتا ہے دینے کو منہ چاہیے                              دینے والا ہے سچا ہمارا نبی

غمزدوں کو رضاؔ مژدہ دیجے کہ ہے                            بیکسوں کا سہارا ہمارا نبی

(حدائقِ بخشش،ص ۱۳۸ تا ۱۴۰)

اعلیٰ حضرت کا عِشْقِ رسول

پىارے پىارے اسلامى بھائىو! اس میں شک نہیں کہ اعلیٰ حضرت رَحْمَۃُ اللہِ عَلَیْہ نے شاعری میں جو مقام پایا ہے،اس کی مثال نہیں ملتی۔ یقیناً یہ کہا جاسکتا ہے کہ آپ رَحْمَۃُ اللہِ عَلَیْہ کے لکھے ہوئے کلاموں کو بارگاہِ مصطفےٰ میں بھی قبولیت حاصل تھی۔ آئیے اسی طرح کا ایک واقعہ سنتے ہیں،چنانچہ اعلیٰ حضرت امام احمد رضا خان رَحْمَۃُ اللّٰہ عَلَیْہ دُوسری بار حج کے لئے حاضِر ہوئے تو مدینۂ منوَّرہ میں نبیِ رَحمت،شفیعِ اُمّت صَلَّی اللّٰہُ عَلَیْہِ واٰلِہٖ وَسَلَّمَکی زِیارت کی آرزو لئے روضۂ اَطہر کے سامنے دیر تک صلوٰۃ وسلام پڑھتے رہے،مگر پہلی رات قسمت میں یہ سَعادت نہ تھی۔ اِس موقع پر وہ معروف نعتیہ غَزل لکھی، جس کے مَطْلَع (یعنی پہلے شعر)میں دامنِ رحمت سے وابستگی کی اُمّید دِکھائی ہے:

وہ سُوئے لالہ زار پھرتے ہیں                                     تیرے دن اے بہار پھرتے ہیں

(حدائقِ بخشش،ص۹۹)