اِصْلاح کیسے ہو سکتی ہے ؟  اللہ پاک قرآنِ کریم میں فرماتا ہے :

قُلْ اِنْ كَانَ اٰبَآؤُكُمْ وَ اَبْنَآؤُكُمْ وَ اِخْوَانُكُمْ وَ اَزْوَاجُكُمْ وَ عَشِیْرَتُكُمْ وَ اَمْوَالُ اﰳقْتَرَفْتُمُوْهَا وَ تِجَارَةٌ تَخْشَوْنَ كَسَادَهَا وَ مَسٰكِنُ تَرْضَوْنَهَاۤ اَحَبَّ اِلَیْكُمْ مِّنَ اللّٰهِ وَ رَسُوْلِهٖ وَ جِهَادٍ فِیْ سَبِیْلِهٖ فَتَرَبَّصُوْا حَتّٰى یَاْتِیَ اللّٰهُ بِاَمْرِهٖؕ   ( پارہ : 10 ، سورۂ توبہ : 24 )

ترجَمہ کنز الایمان : تم فرماؤ اگر تمہارے باپ اور تمہارے بیٹے اور تمہارے بھائی اور تمہاری عورتیں اور تمہارا کنبہ اور تمہاری کمائی کے مال اور وہ سودا جس کے نقصان کا تمہیں ڈر ہے اور تمہارے پسند کے مکان یہ چیزیں اللہ اور اس کے رسول اور اس کی راہ میں لڑنے سے زیادہ پیاری ہوں تو راستہ دیکھو ( انتظار کرو )  یہاں تک کہ اللہ اپنا حکم لائے۔

                             اعلیٰ حضرت امامِ اہلسنت ، شاہ امام احمد رضا خان رَحمۃُ اللہ عَلَیْہ فرماتے ہیں : اس آیت سے معلوم ہوا کہ جسے دُنیا جہان میں کوئی مُعَزَّز ، کوئی عزیز ، کوئی مال ، کوئی چیز اللہ ور سول سے زیادہ محبوب ہو ، وہ بارگاہِ اِلٰہی سے مردُود ہے ، اللہ پاک اسے اپنی طرف راہ نہ دے گا ، اسے عذابِ اِلٰہی کے انتظار میں رہنا چاہئے۔ ^{( [1] )}    

اللہ پاک کے محبوب نبی ، رسولِ ہاشمی صلی اللہ عَلَیْہِ وَ آلِہٖ وَسَلَّم کا ارشادِ پاک ہے : تم میں کوئی اس وقت تک  ( کامِل )  مسلمان نہ ہو گا ، جب تک میں اسے اس کے ماں ، باپ ، اولاد اور سب آدمیوں سے زیادہ پیارا نہ ہو جاؤں۔ ^{( [2] )}   

مُحَمَّد ( صلی اللہ عَلَیْہِ وَ آلِہٖ وَسَلَّم )  کی محبّت دینِ حق کی شرطِ اَوَّل ہے                 اسی میں ہو اگر خامی تو سب کچھ نامکمل ہے