وِردِ لَب ہو ’’مدینہ مدینہ‘‘      جب چلے سُوئے طیبہ سفینہ

جب مدینے میں ہو اپنی آمد     جب میں دیکھوں تِرا سبز گنبد

ہِچکیاں باندھ کر روؤں بے حد         کاش! آجائے ایسا قرینہ

                                                          (وسائلِ بخشش،ص:۱۸۸)

            میٹھے میٹھے اسلامی  بھائیو! وہ  لوگ جو بِغیراچّھی نِیّت مَحض لَذتِ نَفْس و حُبِِّ جاہ کے سبب اپنے مکان پر حج مُبارَک کا بورڈ لگاتے اور اپنے حج کا خُوب چرچا کرتے ہیں، ان کے لیےایک کمال دَرَجے کی عاجِزی پرمُشتمل حِکایت پیشِ خدمت ہے، چُنانچِہ حضرتِ سَیِّدُنا سُفیان ثَوری عَلَیْہِ رَحْمَۃُ اللّٰہ ِالْقَوِی حج کے لئے بصرہ سے پیدل نکلے۔ کسی نے عرض کی:آپ رَحْمَۃُ اللہِ تَعَالٰی عَلَیْہ سُوار کیوں نہیں ہوتے؟فرمایا: کیا بھاگے ہوئے غُلام کو اپنے ربِّ کریم کے دَربار میں صُلْح کے لئے سُواری پرجاناچاہیے؟میں اِس مُقدّس سر زمین میں جاتے ہوئے بَہُت زیادہ شَرْم محسوس کرتا ہوں۔(تَنْبِیہُ الْمُغْتَرِّیْن ص۲۶۷،از رفیق الحرمین ،ص۵۴)

اے زائرِ مدینہ تُو خوشی سے ہنس رہا ہے

دلِ غمزدہ جو لاتا تو کچھ اور بات ہوتی

(وسائل ِ بخشش،ص۳۸۵)

صَلُّوْا عَلَی الْحَبِیْب!                                   صَلَّی اللّٰہُ تَعَالٰی عَلٰی مُحَمَّد

            میٹھے میٹھے اسلامی  بھائیو!حرمینِ طَیِّبَیۡن کی زِیارت کیلئے جانا نصیب کی بات ہے ۔اس لیے جب بھی یہ پُر مُسرَّت موقع مُیَسَّر آئے تو نِہایت عقیدت و اَدَب کے ساتھ سَراپا عِجْز ونیاز کے پیکر بن کر یہ مُقدَّس سفر کیجئے! راہ میں پیش آنے والی مُشکلات پر صَبْر، صَبْر اور صَبْر اور پھر بھی صَبْر ہی سے کام لیجئے!