زبان کاگناہ

زبان کا گناہ یہ ہے کہ اِس سے ایسی باتیں کرنا جو اللہ کریم کی ناراضی کا سبب بنے،اِس لئےگالی گلوچ، جھوٹ،غِیْبَت،چُغلی وغیرہ سے زَبان کو ناپاک ہونے سے بچایئے۔اے کاش!زَبان صِرْف و صِرْف نیک و جائز باتوں کیلئے ہی حَرَکت میں آئے،مَثَلاً زَبان سے تلاوتِ قرآن کیجئے، ذِکْر و دُرُود کا وِرْد کیجئے۔حَمْد ونعت شریف پڑھئے، دَرْس دیجئے،سُنّتوں بھرا بیان کیجئے ،نیکی کی دعوت دیجئے وغیرہ۔

ہاتھ کا گناہ

ہاتھوں کو ربِّ کریم کی نافرمانی میں استعمال کرنا ہاتھوں کا گناہ ہے ،لہٰذا ہماری یہی کوشش ہو کہ کسی پر ظلماً ہاتھ نہ اُٹھیں،رِشوت لینے دینے کے لئے نہ اُٹھیں، نہ کسی کامال چُرائیں،نہ تاش کھیلیں نہ پتنگ اُڑائیں۔جب بھی ہاتھ اُٹھیں، صِرْف نیک کاموں کے لئے اُٹھیں،مَثَلاً باوُضو قرآنِ کریم کو ہاتھ لگائیے،وغیرہ۔

پاؤں کا گناہ

پاؤں کا گناہ یہ ہے کہ اِن سے ایسی جگہوں پر جانا کہ جن سے اللہ کریم نے منع فرمایا ہے،مَثَلاً ہمیں چاہیے کہ ہم ہر گز ہرگز سینما  گھر کی طرف نہ چلیں، گناہوں کی مجلسوں کی طرف نہ چلیں، شطرنج ،لُڈو،تاش،کرکٹ،فٹ بال،وِڈیوگیمز، وغیرہ وغیرہ کھیلنےیا دیکھنے کی طرف نہ چلیں، کاش!پاؤں اُٹھیں تَو صِرْف و صِرْف نیک کاموں کیلئے اُٹھیں، نیکی کی دعوت دینے کیلئے چلیں،سُنّتوں بھرے اِجتماع کی طرف چلیں،اللہ کریم ہمیں رَمَضان  وغیر رَمَضان میں اپنے اَعضاء کو گناہوں سے بچانے اور اِن کے ذریعے نیک و جائز کام کرنے کی تَوفِیْق عطا فرمائے۔اٰمِیْن بِجَاہِ النَّبِیِ الْاَمِیْن صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ