Book Name:Ramazan Ki Amad Marhaba
آئیے!اب اَعضاء کے ذریعے گناہوں کی چند مثالیں مُلاحَظہ کیجئے،چنانچہ
آنکھ کا گناہ یہ ہے کہ اِس سے اللہ پاک کی حرام کردہ چیزیں دیکھنا،لہٰذا ہر مسلمان کو چاہیے کہ وہ اپنی آنکھوں کو حرام دیکھنے سے بچائےاور آنکھ کا روزہ رکھے،اِس طرح کہ آنکھ جب بھی اُٹھے تو صِرْف وصِرْف جائز کاموں ہی کی طرف اُٹھے۔آنکھ سے مسجِد دیکھئے،قرآنِ کریم دیکھئے،مزاراتِ اَولیاکی زیارت کیجئے ،عُلَمائے کِرام،مَشائخِ عُظّام اور اللہ کریم کے نیک بندوں کا دِیدار کیجئے ،کعبے شریف کے اَنوار دیکھئے ،مکّے شریف کی مہکی مہکی گلیاں(Streets) دیکھئے،گنبدِ خضریٰ کا جلوۂ نورباردیکھئے،بیابانِ عر ب کا حسین گلزاردیکھئے۔
کانوں کا گناہ یہ ہے کہ اِس سے اُن باتوں کو سُننا جن سے اللہ کریم نے منع فرمایا ہے،لہٰذا ہرگز ہرگز کانوں سے گانے باجے اور موسیقی نہ سُنئے، جھوٹے چُٹکلے نہ سُنئے ،کسی کی غِیْبَت و چُغلی اورکسی کے عیب نہ سُنئے،جب دو آدَمی چُھپ کر بات کریں تو کان لگا کر نہ سُنئے۔کانوں کا روزہ رکھئے!وہ یوں کہ صرف و صرف جائز باتیں سُنئے، مَثَلاً کانوں سے تلاوت،حمد و نعت اور بزرگوں کی منقبتیں،سُنّتوں بھرے بیانات و مدنی مذاکرے اور اچھی اچھی باتیں سُنئے، اَذان و اِقامت سُنئے اور سُن کر جواب بھی دیجئے وغیرہ۔
زبان کا گناہ یہ ہے کہ اِس سے ایسی باتیں کرنا جو اللہ کریم کی ناراضی کا سبب بنے،اِس لئےگالی گلوچ، جھوٹ،غِیْبَت،چُغلی وغیرہ سے زَبان کو ناپاک ہونے سے بچایئے۔اے کاش!زَبان صِرْف و صِرْف نیک و جائز باتوں کیلئے ہی حَرَکت میں آئے،مَثَلاً زَبان سے تلاوتِ قرآن کیجئے، ذِکْر و دُرُود کا وِرْد کیجئے۔حَمْد ونعت شریف پڑھئے، دَرْس دیجئے،سُنّتوں بھرا بیان کیجئے ،نیکی کی دعوت دیجئے وغیرہ۔