ابُوہُرَیْرہ رَضِیَ اللہُ تَعَالٰی عَنۡہُ سے مروی ہے کہ (ایک دفعہ) حضرتِ سیِّدناجبریلِ امین عَلَیْہِ السَّلَام نے  رسولِ اکرم، نُورِ مجسَّم صَلَّی اللّٰہُ تَعَالٰی عَلَیْہِ وَاٰلِہٖ وَسَلَّم کی خدمتِ اَقْدس میں حاضِر ہو کر عَرْض کی: یا رسولَ اللہصَلَّی اللہُ تَعَالٰی عَلَیْہِ وَاٰلِہٖ وَسَلَّم!یہ خدیجہ آ رہی ہیں، ان کے پاس برتن ہے جس میں کھانا ہے۔ جب وہ آپ کے پاس پہنچیں تو انہیں ان کے رَبّ عَزَّ  وَجَلَّ کا اورمیرا سلام کہئے اورجنت میں خول دار (اندر سے خالی)  موتی سے بنے ہوئے گھر کی بشارت دیجئے جس میں شور ہے نہ کوئی تکلیف۔⁽¹⁾

سلام کا جواب

حضرتِسَیِّدَتُنَاخدیجہ رَضِیَ اللہُ تَعَالٰی عَنۡہَا نے سلام کا جواب دیتے ہوئے کہا: ”اِنَّ اللہَ ھُوَ السَّلَامُ وَعَلٰی جِبْرِیْلَ السَّلَامُ وَعَلَیْکَ السَّلَامُ وَرَحْمَۃُ اللہِ وَبَرَکَاتُہُ یعنی اللہ عَزَّ وَجَلَّ سَلَام  ہے اور حضرتِ جبریل عَلَیْہِ السَّلَام اورآپصَلَّی اللہُ تَعَالٰی عَلَیْہِ وَاٰلِہٖ وَسَلَّم پرسلامتی،اللہ عَزَّ وَجَلَّ کی رحمتیں اور برکتیں نازل ہوں۔“⁽²⁾

مادَرِ اَوّلیں اہلِ ایمان کی

ہے یہ اس کی بُزرگی و پاکیزگی

بَرگُزیدہ ہے رَبِّ مُحَمَّد کی بھی

عرش سے جس پہ تسلیم نازِل ہوئی

اُس سرائے سلامت پہ لاکھوں سلام

اُس کا جبریل ملحوظ رکھے ادب

جنتی گوہریں گھر اُسے بخشے رَبّ

کوئی تکلیف اس میں نہ شور و شغب

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

[1]...صحیح البخاری، کتاب مناقب الانصار، باب تزویج النبی صلی الله عليه وسلم،٢/٥٦٥، الحديث:٣٨٢٠، ملتقطاً.

2... السنن الكبرى للنسائى، كتاب المناقب، مناقب خديجة...الخ،٥/٩٤،الحديث:٨٣٥٩