یا خدا حج پہ بُلا آکے میں کعبہ دیکھوں/ چمک تجھ سے پاتے ہیں سب پانے والے/ ضیاء پیر و مرشد مرے رہنما ہیں

ضیاء پیر و مرشد مرے رہنما ہیں

ضِیاء پیر و مرشد مِرے رہنما ہیں

سُرورِ دل و جاں  مِرے دِلرُبا ہیں

کلی ہیں گلستانِ غوثُ الْوَرٰی کی

یہ باغِ رضا کے گُلِ خوشنما ہیں

سہارا ہیں بے کس کا،دکھیوں کے والی

سخا کے ہیں مَخْزن تو کانِ عطا ہیں

خدا کے مَحَبَّت سے سرشار ہیں وہ

دل و جان سے مصطفےٰ پر فدا ہیں

تصوّر جماؤں تو موجود پاؤں

کروں بند آنکھیں تو جلوہ نما ہیں

نہ کیوں اہلِ سنّت کریں ناز ان پر

کہ وہ نائبِ غوث و احمد رضا ہیں

مُنوَّر کریں قلبِ عطّاؔر کو بھی

شہا آپ دینِ مُبِیں کی ضیا ہیں

وسائلِ بخشش مُرَمَّم،ص564

از شیخِ طریقت امیرِ اہلِ سنت  دَامَتْ بَرَکاتُہُمُ الْعَالِیَہ

یا خدا حج پہ بُلا آکے میں کعبہ دیکھوں

یا خدا! حج پہ بُلا آکے میں کعبہ دیکھوں

کاش!اِک بار میں پھر میٹھا مدینہ دیکھوں

پھر مُیَسَّر ہو مجھے کاش وُقُوفِ عَرَفات

جلوہ میں مُزدلِفہ اور مِنٰی کا دیکھوں

جھوم کر خوب کروں خانۂ کعبہ کا طواف

پھر مدینے کو چلوں گُنْبدِ خضرا دیکھوں

سبز گنبد کا حسیں جلوہ دکھادے یارب!

مسجدِ نبوی کا پرنور مَنارہ دیکھوں

چُوم  لوں کاش! نگاہوں سے سنہری جالی

اشکبار آنکھوں سے مِنْبر کا بھی جلوہ دیکھوں

تیرے احسان کروڑوں ہیں ہو یہ بھی احساں

یا خدا نزع میں جلوہ میں نبی کا دیکھوں

دوڑ کر قدموں میں عطّاؔر   گروں میں اُس دم

حشر میں جس گھڑی سرکار کو آتا دیکھوں

وسائلِ بخشش مُرَمَّم،ص260

از شیخِ طریقت امیرِ اہلِ سنت  دَامَتْ بَرَکاتُہُمُ الْعَالِیَہ

 

 


 

چمک تجھ سے پاتے ہیں سب پانے والے

چمک تجھ سے پاتے ہیں سب پانے والے

مِرا دل بھی چمکادے چمکانے والے

بَرَستا نہیں دیکھ کر ابرِ رحمت

بدوں پر بھی برسا دے برسانے والے

مدینہ کے خِطّے خدا تجھ کو رکھے

غریبوں فقیروں کے ٹھہرانے والے

تُو زندہ ہے واللہ تُو زندہ ہے واللہ

مِرے چشمِ عالَم سے چُھپ جانے والے

میں مجرم ہوں آقا مجھے ساتھ لے لو

کہ رَستے میں ہیں جابجا تھانے والے

حَرَم کی زمیں اور قدم رکھ کے چلنا

ارے سر کا موقع ہے اَو جانے والے

رَضاؔ نفس دشمن ہے دم میں نہ آنا

کہاں تم نے دیکھے ہیں چَنْدرانے والے

حدائقِ بخشش،ص158

از امامِ اہلِ سنت امام احمد رضا خان عَلَیْہِ رَحمَۃُ الرَّحْمٰن

                                                              


 

Share

Articles

Comments


Security Code