بچّہ پیدا ہونے سے قبل خون آنے پر نماز کا حکم

بچہ پیدا ہونے سے  قبل خون آنے پر نماز کا حکم

سوال:کیا فرماتے ہیں علمائے کرام اس مسئلہ کے بارے میں کہ ایک عورت کے  بچہ پیدا ہونے میں ابھی تقریباً دو ہفتے  باقی ہیں لیکن اسے ابھی سے ہی خون اور پانی آنا شروع ہوگیا ہے۔ کبھی خون آنے لگ جاتا ہے تو کبھی رُک جاتا ہے، تو کیا اس خون آنے کی صورت میں اس عورت  کے لئے نماز معاف ہے یا  پھر اسے نماز پڑھنا ہوگی؟ نیز  اگر نماز پڑھنا  ہوگی تو کیا ہر نماز سے پہلے غسل کرنا بھی ضروری ہوگا؟ یا فقط ناپاک جگہ کو دھو کر وضو کرکے نماز پڑھنا ہی  کافی ہوگا؟

بِسْمِ اللّٰہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

پوچھی گئی صورت میں اس عورت پر نماز پڑھنا فرض ہے، کیونکہ حاملہ عورت کو دورانِ حمل آنے والا خون، اسی طرح بچہ کی پیدائش کے وقت جبکہ بچہ ابھی آدھے سے زیادہ باہر نہ نکلا ہو آنے والا خون، استحاضہ کے حکم میں ہوتا ہے اور حالتِ استحاضہ میں نماز روزہ معاف نہیں۔البتہ خون آنے کی صورت میں اس عورت پر ہر نماز سے پہلے غسل کرنا ضروری نہیں بلکہ ناپاک جگہ کو دھو کر وضو کرلینا کافی ہے، کیونکہ استحاضہ کا خون نواقضِ وضو میں سے ہےاس خون سےغسل فرض نہیں ہوتا البتہ ایسا خون وضو توڑ دے گا۔البتہ اگر عذرِ شرعی ثابت ہو جائے تو پھر استحاضہ والی عورت کو مزید بھی کئی اعتبار سے رعایت مل جاتی ہے۔بہارِ شریعت میں ہے:”استحاضہ میں نہ نماز  معاف ہے نہ روزہ، نہ ایسی عورت سے صحبت حرام۔“ (بہار شریعت،ج1،ص385)

وَاللہُ اَعْلَمُ عَزَّوَجَلَّ وَ رَسُوْلُہٗ اَعْلَم صلَّی اللہ علیہ واٰلہٖ وسلَّم

کیا نفلی  اعتکاف ٹوٹنے پر قضا ہے؟

سوال:کیا فرماتے ہیں علمائے کرام اس مسئلہ کے بارے میں کہ ایک اسلامی بہن ستائیسویں شب  سے تین دن کی نیت سے اعتکاف میں بیٹھ گئی ، اس نے اعتکاف  کی منت بھی نہیں مانی تھی،  بس ایسے ہی نیت کرکے اعتکاف میں بیٹھ گئی، لیکن انتیسویں (29) روزے کو ا سے حیض آیا، تو روزہ ٹوٹنے کی وجہ سے اعتکاف بھی ٹوٹ گیا، اب اس اعتکاف کی قضا کیسے کرنی ہوگی ؟

بِسْمِ اللّٰہِ الرَّحْمٰنِ الرَّحِیْمِ

اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَایَۃَ الْحَقِّ وَالصَّوَابِ

صور تِ مسئولہ میں اعتکاف ختم ہونے کی وجہ  سے اس کی قضا لازم  نہیں ہوگی، کیونکہ مذکورہ اعتکاف سنتِ مؤکدہ نہیں  ہےکہ سنّتِ مؤکدہ آخری دس دن کا ہوتا ہے اس سے کم کا نہیں ، اور اس کی منّت بھی نہیں مانی تویہ نفل ہوا اورمسجدِ بیت میں نفلی اعتکاف ہوسکتاہے لہٰذا یہ اعتکاف نفلی ہے اور نفلی اعتکاف کی قضا لازم نہیں ہوگی۔ ردالمحتار میں عورت کے اعتکاف کےمتعلق ہے:فلو خرجت منہ ولو الی بیتھا بطل الاعتکاف  لو واجبا،ونتھی لو نفلا یعنی اگر عورت مسجدِ  بیت سے نکلے اگرچہ اپنے گھر کی طرف تو اس کا اعتکاف اگر واجب ہوا تو ٹوٹ  جائےگا ، اور نفل ہوا تو پورا  ہوجائے گا۔(ردالمحتار ،ج03،  ص435،مطبوعہ ملتان  )صدر الشریعہ  مفتی امجد علی اعظمی  علیہ الرّحمۃ  بہارِ شریعت میں اعتکاف   کی قضا کے بارے میں فرماتے ہیں :”اعتکافِ نفل اگر چھوڑ دے تو اس کی قضا نہیں کہ وہیں ختم ہوگیا اور اعتکافِ مسنون کہ رمضان کی پچھلی دس  تاریخوں تک کیلیے بیٹھا تھا اسے توڑا تو جس دن توڑا فقط اس ایک دن کی قضا کرے پورے دس  دن کی قضا واجب نہیں اور  منّت کا اعتکاف توڑا تو اگر کسی معین مہینے کی منّت تھی تو باقی دنوں کی قضا کرے  ورنہ اگر عَلَی الْاتِّصال واجب ہوا تھا تو سرے سے اعتکاف کرے اور اگر  عَلَی الْاتِّصال واجب نہ تھا تو باقی کا اعتکاف کرے۔(بہار شریعت ،ج1،ص1028)

وَاللہُ اَعْلَمُ عَزَّوَجَلَّ  وَرَسُوْلُہٗ اَعْلَم صلَّی اللہ علیہ واٰلہٖ وسلَّم

_______________________

٭…مفتی ابو محمد علی اصغر عطاری مدنی 

٭…دارالافتاء اہل سنت نور العرفان کھارادر ،کراچی

Share

بچّہ پیدا ہونے سے قبل خون آنے پر نماز کا حکم

برتن ہمارے کھانے پینے کی ضروریات کو پورا کرنے میں اَہَم کِردار ادا کرتے ہیں، ہماری زندگی میں برتنوں کی جتنی اَہَمیّت ہے اتنا ہی ان کی صفائی کا خیال رکھنابھی ضروری ہے۔ بالخصوص (Specially)ان کے اندرونی حصّہ کی صفائی کا خاص خیال رکھنا چاہئے۔اگر برتنوں کی صفائی پر توجّہ نہ دی جائے تو ان میں جراثیم (Germs) اَفزائش پاکرہماری صحت (Health) کو نُقصان پہنچاتے ہیں۔اِنہی برتنوں میں نان اِسٹک برتن، پلاسٹک کے برتن، لوہے کے توے، کڑاہی، فرائی پین ہمارے گھروں میں بہت زیادہ استعمال ہوتے ہیں اور مسلسل استعمال و بے تَوَجُّہی کے سبب ان پر اکثر ایک تہہ چڑھ جاتی ہے جو گھی یا  تیل کے استعمال کرنے کے بعد اچھی طرح صفائی نہ کرنے کی وجہ سے بہت سخت ہوجاتی ہے۔ ان کی صفائی کا ایک آسان اور سَسْتا طریقہ اور سامان  ہمارے باورچی خانے (Kitchen) میں ہی موجود ہوتا ہے۔ نان اِسٹک اور لوہے کے برتن  صاف کرنے کا طریقہ:فرائی پین، کڑاہی یا توے کو چُولھےپررکھ کر چُولھا جَلا دیں،  اب اس میں تھوڑا سا پانی،  آدھا کپ سِرکہ(Vinegar)، ایک چمچ میٹھا سوڈا اور ایک چمچ کوئی سا بھی  واشنگ پاؤڈَر ڈال کر پانچ سے دَس منٹ تک پکائیں، اِس دوران کسی بھی لکڑی کے چمچ (Wooden Spoon) یا کف گِیر سے (نان اِسٹک برتنوں میں لکڑی کے چمچ استعمال کیاکریں) اس مکسچر کو ہِلائیں،  پھر چولہا  بند کرکے اس کو کسی چمچ یا لوہے کے تار سے رگڑیں(نان اِسٹک برتنوں میں لوہے کا تار یا چمچ استعمال نہ کریں ورنہ اس کی اُوپری تہہ اُتر جاتی ہےاور برتن خراب ہو جاتے ہیں) بہت آسانی  کے ساتھ ساری گندگی اُتر جائے گی، اب کسی بھی لیکویڈ یا صابُن سے برتن دھو لیں ، برتن چکنائی سے بِالکل صاف ہو جائے گا۔ ٭عموماً سوس پین،کڑاہی یا تَوا باہر سے جَل جاتے اور کاربن کی ایک موٹی تہہ جَم جاتی ہے، اس کے لئے ایک کُھلے برتن میں اتنا پانی  لیں جس میں جَلا ہوا برتن آسکے ، اب اس پانی میں ایک چمچ واشنگ پاؤڈر، ایک  چمّچ نمک، ایک   چمچ میٹھا سوڈا  اور چار چمّچ سِرکہ ڈال کر جَلے ہوئے برتن کو ڈال کر تیز آنچ پر 10 سے 15 منٹ رکھیں، پھر نکال کر چمچ یا چُھری (knife)کی مددسے کُھرَچ کرصاف کر لیں،پھرکسی فوم (foam) کی مدد سے صابن سے دھو لیں۔ پلاسٹک کے برتن،مائیکروویو اووَن اور فریج کی صفائی: پلاسٹک کے برتنوں میں پیلا پن آجاتا ہے جو برتنوں کو بدنُما کردیتا ہے اسی طرح فریج کی اندرونی پلاسٹک کی دیواریں اور مائیکروویو اووَن(Microwave Oven)  کا اندرونی حصّہ صاف کرنے کےلئے میٹھے سوڈے کو پانی میں ملا کر گاڑھا سا مکسچر بنالیں اور فریج یا اوون کےاندرونی حصّوں پر لگا کر 10 سے 15 منٹ کے لئے چھوڑ دیں (پہلے فریج یا اوون کی تار پلگ سے الگ کرنا نہ بُھولئے)، یونہی پلاسٹک کے پیلے برتنوں میں بھی لگا کر چھوڑ دیں۔ پھر  کسی جالی یا فوم وغیرہ سے رگڑیں سارا پِیلاپَن،  داغ دَھبّے دُور ہوجائیں گے۔ اس کے بعد  فریج کے اندرونی حصّے کو کسی صاف سُوتی  کپڑے سے اچھی طرح خُشک کرلیں اور برتنوں کو سادے پانی سے دھولیں۔ اِسی طریقۂ کار پر گھر کی دیگر اشیاء جیسے پلاسٹک کی کُرسیاں، اِستری (Iron)، چینی کے برتن، گھریلو استعمال کے مَگ اور دیگر سامان بھی صاف کیا جاسکتا ہے۔لوہے کے برتنوں کو زنگ سے بچانے کا طریقہ: لوہے کے برتنوں کو دھونے کے بعد کسی سُوتی کپڑے سے اچھی طرح خُشک (Dry) کر لیں اور ایک منٹ کے لئے چُولہے پر رَکھ کر  گرم کرلیں،اس طرح پانی بالکل خُشک ہو جائے گا،  زنگ نہیں لگے گا۔ اللہ پاک ہمیں اپنے گھر،لباس اور دل کو صاف رکھنے کی توفیق نصیب فرمائے۔اٰمِیْن بِجَاہِ النَّبِیِّ الْاَمِیْن  صلَّی اللہ علیہ واٰلہٖ وسلَّم

_______________________

٭بنت رمضان نقشبندیہ عطاریہ

Share

Articles

Comments


Security Code