پىارے پىارے اسلامى بھائىو! ابھی ہم نے سُنا کہ مَدِیْنَۂ مُنَوَّرَہ وہ مبارک شہر ہے،جسے ہمارے  پیارے آقا،میٹھے میٹھے مصطفےٰ صَلَّی اللہُ عَلَیْہِ وَاٰلِہٖ وَسَلَّمنےشَر فِ قیام بخشا،آپ صَلَّی اللّٰہُ عَلَیْہِ واٰلِہٖ وَسَلَّمَ کے قدموں کی برکت سے اس شہر کے وارے ہی نیارے ہو گئے، آپ عَلَیْہِ الصَّلٰوۃُ وَالسَّلَام کے قدموں کی برکت سے شہرِ مدینہ نے وہ عظمت پائی  کہ اب اس شہر میں رہنا عافیت کی علامت اور اس میں مرنا شفاعت کی ضمانت قرار پایا، آئیے!حاضری ِمدینہ کاشوق اورتڑپ بڑھانے  اوردل میں  مَحَبَّتِ مدینہ میں اِضافے کی نیّت  سے عظمتِ مدینہ  سے مُتَعَلِّق3 فرامینِ مصطفےٰ سنتے ہیں :

1۔   ارشاد فرمایا:مدینے میں داخل ہونے کے تمام راستوں پرفِرِشتے ہیں،اس میں طاعُون اور دَجَّال داخل نہ ہوں گے۔^([1])                  

2۔  ارشاد فرمایا:اُس ذات کی قسم !جس کے دَسْتِ قُدرت میں میری جان ہے! مدینے میں نہ کوئی گھاٹی ہے نہ کوئی راستہ مگر اُ س پر دوفِرشتے ہیں جو اِس کی حفاظت کررہے ہیں۔ ‘‘^([2])امام نَوَویرَحْمَۃُ اللہِ عَلَیْہ فرماتے ہیں: اس روایت میں مدینۂ مُنوَّرَہ کی فَضیلت کا بیان ہے اور جانِ رحمت، تاجدارِ رسالت  صَلَّی اللہُ عَلَیْہِ وَاٰلِہٖ وَسَلَّم کے زمانے میں اس کی حفاظت کی جاتی تھی، کثرت سے فِرِشتے حفاظت کرتے اور اُنہوں نے تمام گھاٹیوں کو سرکارِ مدینہ، والیِ مکہ  صَلَّی اللہُ عَلَیْہِ وَاٰلِہٖ وَسَلَّم کی عِزَّت اَفزائی کے لئے گھیرا ہوا ہے۔  ^([3])

مدینہ مدینہ ہمارا مدینہ                                            ہمیں جان و دل سے ہے پیارا مدینہ

سُہانا سُہانا دل آرا مدینہ                                                دِیوانوں کی آنکھوں کا تارا مدینہ

مدینے کے جلوؤں کے قربان جاؤں              خدا نے ہے کیسا سَنوارا مدینہ