ایک اور اللہ کے ولی، زبردست عالم، بہت بڑے محدث، چودہویں صدی کے شیخِ کامل، عاشقِ رسول حضرت سَیِّدُناشیخ امام یوسف بن اسمعیل نبہانی رَحْمَۃُ اللہِ عَلَیْہ  کا یومِ وصال دو رمضان کو ہے۔ اللہ پاک ان کے فیوض و برکات سے بھی ہمیں مستفید فرمائے۔ حضرت سَیِّدُناامام نَبہانی رَحْمَۃُ اللہِ عَلَیْہ  سفید داڑھی والے نورنور چہرے والے بزرگ تھے، حضرت سَیِّدُناامام نَبہانی رَحْمَۃُ اللہِ عَلَیْہ  کا مقام و مرتبہ تو اپنی جگہ ان کی زوجہ کے بارے میں منقول ہے کہ اُنہیں خواب میں 84بار جنابِ رسالت مآب صَلَّی اللّٰہُ عَلَیْہِ واٰلِہٖ وَسَلَّمَ کا دیدار ہوا۔ (جامع کراماتِ او لیاء، ص۶۷) اللہ کریم اپنے نیک بندوں کے صدقے ہمیں بھی جلوۂ محبوب صَلَّی اللّٰہُ عَلَیْہِ واٰلِہٖ وَسَلَّمَ  کی زیارت عطا فرمائے۔ اٰمِین بِجَاہِ النَّبِیِّ الْاَمِیْن صَلَّی اللہُ عَلَیْہِ وَاٰلِہٖ وَسَلَّم   شیخِ طریقت، اَمِیرِ اہلسنّت دَامَتْ بَرَکَاتُہُمُ الْعَالِیَہکتنی پیاری دعا کرتے ہیں:  

صدقے میں مِرے غوث کے تُو خواب میں یاربّ!              جَلوہ مجھے سلطانِ مدینہ کا دِکھا دے

       ہر وَقْت جہاں سے کہ اُنہیں دیکھ سکوں میں                      جنَّت میں مجھے ایسی جگہ پیارے خُدا دے

                           اللہ مجھے سوز و گُداز ایسا عَطا کر                                        تڑپا دے بیاں نعتِ نبی مجھ کو رُلا دے

(وسائلِ بخشش مرمّم، ص۱۱۹، ۱۲۰)

صَلُّو ْا عَلَی الْحَبِیْب!                                  صَلَّی اللہُ عَلٰی مُحَمَّد

      پىاری پىاری اسلامى بہنو!  اَلْحَمْدُ لِلّٰہ فی زمانہ دعوتِ اسلامی کا مہکتا ہوا مدنی ماحول  ایک نعمت سے کم نہیں ہے۔ اس مدنی ماحول میں جہاں فرائض و واجبات پر عمل کی ترغیب دلائی جاتی ہے وہیں بزرگانِ دین  کا ادب واحترام دل میں بسانے کی بھی تعلیم دی جاتی ہے۔ آپ بھی دعوتِ اسلامی کے مدنی ماحول سے وابستہ ہو جائیں اور جتنا ہو سکے ذیلی حلقے کے8مَدَنی کاموں میں عملی طورپرشرکت کی سعادت حاصل کریں۔