قبولِ حق محبتِ اِلٰہی کے لئے شرطِ اَوَّل ہے

اَمِیْرُ الْمُؤْمِنِیْن حضرت عثمانِ غنی رَضِیَ اللّٰہُ عَنْہُ کے اسلام قبول کرنے سے پہلے کی بات ہے ، ایک رات آپ رَضِیَ اللّٰہُ عَنْہُ گھر تشریف لائے تو دیکھا کہ آپ کی خالہ محترمہ حضرت سُعْدیٰ رَضِیَ اللّٰہُ عَنْہَا  گھر آئی ہوئی ہیں ، خالہ محترمہ نے حضرت عثمانِ غنی رَضِیَ اللّٰہُ عَنْہُ کو دیکھ کر فرمایا : اے عُثْمان ! مُحَمَّد صَلَّی اللہ عَلَیْہِ وَاٰلِہٖ وَسَلَّم نبی ہیں،جنہیں اللہ پاک نے بُرہان (یعنی دلیل) دے کر بھیجا اور دِیْنِ حق کے ساتھ مَبْعُوث فرمایا ہے ، اِن کی فرمانبرداری کر۔

خالہ جان نے حضرت عثمان رَضِیَ اللّٰہُ عَنْہُ  کو سمجھاتے ہوئے دِیْنِ اسلام کی سچائی کے متعلق اور بھی باتیں ارشاد فرمائیں ، حضرت عثمانِ غنی رَضِیَ اللّٰہُ عَنْہُ فرماتے ہیں : خالہ جان کی باتیں میرے دِل میں بیٹھ گئیں ، اب میں اس بارے میں غور و فکر کرنے لگا۔  حضرت ابو بکر صدیق رَضِیَ اللّٰہُ عَنْہُ میرے دَوْست تھے ، میں اُن کے پاس چلا گیا ، اتفاق سے اس وقت حضرت ابو بکر صدیق رَضِیَ اللّٰہُ عَنْہُ اکیلے ہی تھے ، میں ابھی تک خالہ کی باتوں کے متعلق غور و فکر کررہا تھا ، حضرت ابو بکر صدیق رَضِیَ اللّٰہُ عَنْہُ نے مجھے سوچ میں ڈوبا ہوا دیکھ کر اس کی وجہ پوچھی تو میں نے خالہ جان کی تمام باتیں حضرت ابو بکر صدیق رَضِیَ اللّٰہُ عَنْہُ کو بتا دیں ، میری باتیں سُن کر حضرت ابو بکر صدیق رَضِیَ اللّٰہُ عَنْہُ نے فرمایا : عثمان !  تم تو سمجھدار آدمی ہو ، تم پر حق کیسے پوشیدہ رہ گیا...؟ پھر حضرت ابو بکر صدیق رَضِیَ اللّٰہُ عَنْہُ نے مجھے اسلام کے بارے میں بتایا ، کفر و شرک کی نحوست سے آگاہ کیا اور کہا :  عثمان ! آپ کی خالہ نے سچ فرمایا ہے ، واقعی مُحَمَّد بن عبد اللہ صَلَّی اللہ عَلَیْہِ وَاٰلِہٖ وَسَلَّم اللہ پاک کے سچے رسول ہیں ، اللہ پاک نے ان کے سرِ انور پر تاجِ رِسالت سجا کر تمام مخلوق کی ہدایت کے لئے بھیجا ہے ،  اے عثمان ! تم خود اُن کی خدمت میں حاضِر ہو کر اُن کا کلام کیوں نہیں سُن لیتے؟