محمد کی محبت دینِ حق کی شرطِ اَوَّل ہے     اسی میں ہو اگر خامی تو سب کچھ نامکمل ہے

صَلُّوْا عَلَی الْحَبیب!                                                 صَلَّی اللّٰہُ عَلٰی مُحَمَّد

 اے عاشقانِ رسول  ! 18 ذُو الحج مسلمانوں کے تیسرے خلیفہ ، اَمِـیْرُ الْـمُؤْمِنِیْن  حضرت عثمانِ غنی  رَضِیَ اللّٰہُ عَنْہُ کے عُرْسِ پاک کا دِن ہے ، اَلْحَمْدُ للہ!حضرت عثمانِ غنی رَضِیَ اللّٰہُ عَنْہُ اللہ پاک سے بےپناہ محبت کرنے والے تھے ، آئیے ! حضرت عثمانِ غنی رَضِیَ اللّٰہُ عَنْہُ کی سیرتِ پاک کی روشنی میں دیکھتے ہیں کہ اللہ پاک سے محبت کرنے والوں کا اندازِ زِندگی کیسا ہوتا ہے ، ان کے اَوْصاف کیا کیا ہوتے ہیں ، یُوں ذِکْرِ عثمانِ غنی رَضِیَ اللّٰہُ عَنْہُ کی برکتیں بھی نصیب ہو جائیں گی اور ساتھ ہی اللہ پاک سے محبت کرنے والوں کے چند انداز اور اَوْصَاف بھی سیکھنے کو مل جائیں گے۔  

عثمانِ غنی رَضِیَ اللّٰہُ عَنْہُ کا مختصر تعارُف

 * حضرت عثمانِ غنی رَضِیَ اللّٰہُ عَنْہُ صحابئ رسول ہیں  * سرکارِ عالی وقار ، مکی مدنی تاجدار صَلَّی اللہ عَلَیْہِ وَاٰلِہٖ وَسَلَّم کی پھوپھی جان حضرت اُمِّ حکیم رَضِیَ اللّٰہُ عَنْہَا  کے نواسے ہیں یا یُوں کہہ لیجئے کہ ذرا دُور کے رشتے سے مالِکِ جنّت ، قاسِمِ نعمت صَلَّی اللہ عَلَیْہِ وَاٰلِہٖ وَسَلَّم کے بھانجے لگتے ہیں  * سابقینِ اَوَّلِیْن میں سے ہیں یعنی ابتداء ہی میں اسلام قبول کر کے دائرۂ اسلام میں داخِل ہو گئے تھے ، اسلام قبول کرنے میں آپ کا چوتھا یا پانچواں نمبر ہے ، * عشرہ مبشرہ (یعنی زبانِ مصطفےٰ صَلَّی اللہ عَلَیْہِ وَاٰلِہٖ وَسَلَّم سے جنّت کی بشارت پانے والے 10 صحابہ کرام عَلَیْہِمُ الرِّضْوَان) میں سے ہیں  * سرکار اعظم ، رسولِ اکرم صَلَّی اللہ عَلَیْہِ وَاٰلِہٖ وَسَلَّم حضرت عثمانِ غنی رَضِیَ اللّٰہُ عَنْہُ سے اتنی محبت فرماتے تھے کہ آپ نے ایک ، ایک کر کے اپنی 2 شہزادیاں حضرت عثمان رَضِیَ اللّٰہُ عَنْہُ کے نِکاح میں دیں۔ ^([1])  اعلیٰ حضرت ، امامِ اہلسنت رَحمۃُ اللہ عَلَیْہ اسی طرف اشارہ کرتے ہوئے فرماتے ہیں :