کہ جس بندے میں یہ صِفَات پائی جائیں ، اللہ پاک اُس بندے سے محبت فرماتا ہے۔   

پہلی صِفَّت : تقویٰ۔ دوسری صفت : غِنَا۔ اور تیسری صفت ہے : گمنامی۔

محبت میں اپنی گما یااِلٰہی                       نہ پاؤں میں اپنا پتا یااِلٰہی

رہوں مَسْت و بےخود میں تیری وِلا میں        پِلا جام ایسا پِلا یااِلٰہی

مرے دِل سے دُنیا کی چاہت مٹا کر            کر اُلفت میں اپنی فنا یااِلٰہی

بنا دے مجھے نیک نیکوں کا صدقہ              گُنَاہوں سے ہردَم بچا یااِلٰہی^([1])

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد

اب آئیے! ان 3 پسندیدہ صِفَات کی وَضَاحت سنتے ہیں :

پہلی پسندیدہ صفت : تقویٰ

پہلی صفت ہے : تقوی۔ پارہ 3 ، سورۂ آلِ عمران ، آیت : 76 میں ارشاد ہوتا ہے :

فَاِنَّ اللّٰهَ یُحِبُّ الْمُتَّقِیْنَ(۷۶)  (پارہ3 ، سورۃآلِ عمران : 76)                                             

ترجمہ کنزُ العِرفان : بیشک اللہ پرہیزگاروں سے محبت فرماتا ہے۔

پیارے اسلامی بھائیو!  تقویٰ اَصْلِ بندگی ہے ، امام فخرُ الدِّین رازی رَحمۃُ اللہِ عَلَیْہ نے اس بارے میں ایک علمی نکتہ بیان فرمایا ہے ، چنانچہ ارشاد فرماتے ہیں :   اللہ پاک نے ایک  مقام پر قرآنِ کریم کی یہ صِفَّت بیان فرمائی کہ قرآنِ کریم اَہْلِ تقویٰ کے لئے ہدایت ہے ، ارشاد ہوتا ہے :

هُدًى لِّلْمُتَّقِیْنَۙ(۲) (پارہ1 ، سورۂ البقرہ : 2)                         

ترجمہ کنزُ العِرفان : اس میں ڈرنے والوں کے لئے ہدایت ہے۔