حُضُور غوثِ پاک شیخ عبدُالقادِرجیلانی رَحْمَۃُ اللہِ عَلَیْہ کے صاحبزادے حضرت سَیِّدُنا عبدُ الرزّاق جیلانی رَحْمَۃُ اللہِ عَلَیْہ فرماتے ہیں کہ ایک بار عراق کے عُلَما کے پاس ایک مسئلہ آیا کہ ایک شخص نے اپنی بیوی کو یہ کہہ دیا کہ وہ  اللہ پاک کی ایسی عِبَادَت  کرے گا ، جو اُس وقت رُوئے زمین پر کوئی اور شخص نہ کر رہا ہو ، اگر وہ ایسا نہ کر سکا تو اُس کی بیوی کوتین طلاقیں۔ ان اَلْفَاظ  کو ادا کرنے کے بعد شوہر پریشان ہے کہ اس کی بیوی طلاق سے بچ جائے اور اس کی قسم بھی پوری ہوجائے ۔ عراق کے عُلَما نے جب اس مسئلے کو پڑھا تو سب حیران و پریشان  ہوگئے کہ کون سی ایسی عِبَادَت ہے جسے یہ اکیلا ہی کرسکتا ہے اور اتنی بڑی دنیا میں کیسے پتا چلے کہ یہ عبادت اس وَقْت رُوئے زمین پر صرف  یہی کررہا ہے ۔ عراق کے عُلَما نے اس کا جواب حاصل کرنے کےلیے مسئلہ سیّدی شیخ عبدُالقادِرجیلانی رَحْمَۃُ اللہِ عَلَیْہ کی بارگاہ میں پیش کیا اور پوچھا  کہ وہ شخص کیا کرے اور کونسی ایسی  عِبَادَت  کرے کہ اس کی بیوی طلاقوں سے بھی بچ جائے اورقسم بھی نہ توڑنی پڑے؟ آپ نے فورا ً اس کا جواب دیتے ہوئے اِرشَاد  فرمایا : یہ  شخص  مکہ مکرمہ چلا جائے  اور طواف کی جگہ کو خالی  کروا کر   تنہا طواف کے 7  چکر پورے کرلے ، اس کی قسم بھی پوری ہو جائے گی اور اس کی بیوی    کو طلاق بھی نہیں ہو گی۔ حیران و پریشان عُلَما نے جب  آپ کے فوری جواب کو سنا تو حیران رہ گئےاور آپ کے عِلْم کی داد دینے لگے ^([1])

مفتیِ شرع بھی ہے ، قاضی ِمِلّت بھی ہے                                                                                                                           علمِ اَسرار سے ماہِر بھی ہے عبدُالقادِر

منبعِ فیض  بھی ہے  مَجْمَعِ اَفْضال  بھی ہے                                                                                                                                           مِہرِ عِرفاں کا مُنوَّر  بھی ہے عبدُ القادِر^([2])