حَضْرتِ سَیِّدُناکَعبُ الاحبار رَضِیَ اللہُ عَنْہُنے مَزید بتایا :جب قِیامت  کا دِن آئے گا تو اللہ  پاک اوَّلین وآخَرین کو ایک  ٹِیلے  پر جَمْع فرمائے گا، پِھر فِرِشتے نازِل ہو کر صَفیں بَنائیں گے۔ اِس کے بعد اللہ پاک اِرْشاد فرمائے گا:اے جبرائیل! جَہنَّم کو لے آؤ۔ تو حَضْرتِ جبرائیل عَلَیْہِ ا لسَّلَام جَہنَّم کو اِس طرح لے کر آئیں گے کہ اُس کی سَتَّر ہَزار(70000) لگاموں کو کھِینچا جا رہا ہو گا، پھر جَب جَہنَّم مَخلوق سے سو(100) برس کی راہ پر پہنچے گی تو اُس میں اِتنی شَدید بَھڑک پیدا ہو گی کہ جِس سے مَخلوق کے دِل دہل جائیں گے، پھر جب دوبارہ بھڑک پیدا ہوگی تو ہر مُقرَّب فِرِشتہ اور نبیِّ مرسَل گُھٹنوں کے بَل گِر جائے گا، پِھر جَب تیسری مَرتَبہ بھڑکے گی تو لوگوں کے دِل گَلے تک پہنچ جائیں گے اورعقلیں گھبرا جائیں گی، یہاں تک کہ حَضْرتِ سَیِّدُناابراہیم عَلٰی نَبِیِّنَاوَعَلَیْہِ الصَّلٰوۃُ وَالسَّلَام عَرْض  کریں گے :میں تیرے خَلیل ہونے کے صَدْقے صِرف اپنے لئے سُوال کرتا ہوں۔ حَضْرتِ سَیِّدُنا موسیٰ عَلٰی نَبِیِّنَاوَعَلَیْہِ الصَّلٰوۃُ وَالسَّلَام عَرْض گُزار ہوں گے:یا الٰہی! میں اپنی مُناجات کے صَدْقے صِرف اپنے لئے سُوال کرتا ہوں۔حَضْرتِ سَیِّدُنا عیسیٰ عَلٰی نَبِیِّنَاوَعَلَیْہِ الصَّلٰوۃُ وَالسَّلَام عَرْض  کریں گے: یاالٰہی! تُو نے مجھے جو عِزت دی ہے، اس کے صَدْقے میں صرف اپنے لیے سُوال کرتا ہوں ،اُس مریم(رَضِیَ اللہُ عَنْہَا) کیلئے سُوال نہیں کرتا جس نے مجھے جَناہے۔ (جہنم میں لے جانے والے اعمال،ص۹۷،۹۸)

گناہگار ہوں میں لائقِ جہنم ہوں                           کرم سے بخش دے مجھ کو نہ دے سزا یاربّ!

بُرائیوں پہ پشیماں ہوں رحم فرما دے                     ہے تیرے قَہْر پہ حاوی تِری عَطا یاربّ!

گُناہ بے عدد اور جُرْم بھی ہیں لاتعداد                     مُعاف کر دے نہ سہ پاؤں گا سَزا یاربّ!

میں کر کے تَوبہ پلٹ کر گُناہ کرتا ہوں                 حقیقی تَوبہ کا کردے شَرَف عَطا یاربّ!

نہیں ہے نامَۂ عطّار میں کوئی نیکی                           فقط ہے تیری ہی رَحْمت کا آسرا یاربّ!

(وسائلِ بخشش مرمّم، ص۷۸)