مال خرچ کہاں ہو رہا ہے؟ اس کی فِکْر بھی بہت تھوڑے لوگوں کو ہوتی ہے۔ اللہ پاک ہمیں فِکْرِ آخرت نصیب فرمائے۔ اپنی آمدن اور خرچ کے متعلق بہت محتاط رہنا ضروری ہے۔ ورنہ یہ مال ہمیں جہنّم میں لے جانے کا سبب بھی بن سکتا ہے۔ اللہ پاک ہمیں مال و دولت کی حرص سے بچنے، اللہ کریم نے جو مال عطا کیا ہے، اس کے ذریعے جنّت کمانے کی توفیق نصیب فرمائے۔ اٰمِیْن بِجَاہِ  خَاتَمِ النَّبِیّٖن صَلَّی اللہُ عَلَیْہِ وَ آلِہٖ وَ سَلَّم

حُبِّ دُنیا سے تُو بچا یاربّ!                                                                              عاشقِ مُصطَفٰے بنا یاربّ!

آہ! طُغیانیاں گناہوں کی

نفس و شیطان ہوگئے غالب                                     پار نیّا مِری لگا یاربّ!

ان کے چُنگل سے تُو چُھڑا یاربّ!

حِرصِ دنیا نکال دے دل سے                                                           بس رہوں طالبِ رضا یاربّ!^([1])

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد

12دینی کاموں میں سے ایک دینی کام:فجر کے لئے جگانا

پیارے اسلامی بھائیو! خوف آخرت حاصل کرنے اور نیک نمازی بننے کے لئے  عاشقانِ رسول کی دینی تحریک دعوتِ اسلامی کے 12 دینی کاموں میں عملاً حِصّہ لیجئے! دعوتِ اسلامی کے 12 دینی کاموں میں ایک دینی کام ہے: فجر کے لئے جگانا ۔ نمازِ فجر کے لئے جگانا آخری نبی، مکی مدنی صَلَّی اللہُ عَلَیْہِ وَ آلِہٖ وَ سَلَّم کی سُنَّت ہے۔ الحمد للہ! دعوتِ اسلامی سے وابستہ عاشقانِ رسول کی ایک تعداد ہے جو اس سُنَّت پرعمل کے جذبے کے تحت لوگوں کو نماز فجر کے لئے جگانے کی ترکیب کرتی ہے۔ آپ بھی اس دینی کام میں حصہ لیجئے! اِنْ شَآءَ اللہُ الْکَرِیْم!