عِبَادت کرے اور ربوبیت  ( یعنی میرے ربّ ہونے )  کا حق ادا کرے۔ ”زبور شریف“میں ہے : اس سے بڑھ کر ظالِم کون جو جنّت یا جہنّم کی وجہ سے میری عِبَادت کرے ، میں جَنّت اور جہنّم پیدا نہ کرتا تو کیا میری اِطاعَت نہ کی جاتی... ؟ ؟ ^{( [1] )}

اللہ جَنّت و دوزخ نہ بناتا تو... ؟ ؟

ایک مرتبہ چند بزرگ حضرت رابعہ   رَحمۃُ اللہ عَلَیْہا کی خدمت میں حاضِر تھے ، آپ نے پوچھا : اللہ پاک کی عِبَادت کیوں کرتے ہو ؟ ایک نے جواب دیا : ہم جہنّم سے خَوْف زدہ ہیں ، روزِ قیامت جہنّم کے اُوپَر  ( یعنی پُل صِراط پر )  سے گزرنا پڑے گا ، اس سے محفوظ رہنے کے لئے عِبَادت کرتے ہیں ، ایک اور شَخْص نے کہا : ہم جَنّت میں جانے کے لئے عِبَادت کرتے ہیں۔ حضرت رابعہ   رَحمۃُ اللہ عَلَیْہا نے فرمایا : اللہ پاک کی عِبَادت فَرْضِ عین ہے ، اگر وہ جَنّت و دوزخ پیدا نہ کرتا تو کیا بندے اس کی عِبَادت سے منکر ہو جاتے ؟ ^{( [2] )}

جس کا عمل ہو بےغرض اس کی جزاء کچھ اور ہے

حُور وخیام سے گزر ، بادہ وجام سے گزر

وضاحت : یعنی یہ ضروری نہیں کہ جنّتی حُورَیں ، وہاں کے محلّات اور وہاں کی پاکیزہ شراب حاصِل کرنے کے لئے ہی عِبَادت کرنی ہے ، عِبَادت خالِص حقِ بندگی ہے ، ان چیزوں کی فِکْر چھوڑو اللہ پاک کی محبّت میں سرشار ہو کر عِبَادت کرو ! کیونکہ جس کا عَمَل بےغرض ہو ، اس کی جزاء نِرالی ہی ہوتی ہے۔

صَلُّوْا عَلَی الْحَبِیْب !                                                صَلَّی اللہ عَلٰی مُحَمَّد