تھے ، مِصْر کے کچھ لوگوں نے بغاوت کی اور ناحق آپ رَضِیَ اللّٰہُ عَنْہُ کے گھر مبارک کا گھیراؤ کر لیا ، حضرت عثمانِ غنی رَضِیَ اللّٰہُ عَنْہُ اَمِیْرُ الْمُؤْمِنِیْن تھے ، صحابۂ کرام عَلَیْہِمُ الرِّضْوَان نے آپ سے عرض بھی کیا کہ ہمیں اجازت دیجئے ہم تلوار کے زَوْر سے ان باغیوں کو یہاں سے ہٹا دیتے ہیں مگر اَمِیْرُ الْمُؤْمِنِیْن حضرت عثمانِ غنی رَضِیَ اللّٰہُ عَنْہُ خون خرابا پسند نہ فرمایا ، صَبر کرتے رہے۔ ^([1]) باغیوں نے 40 دِن آپ کے مبارک گھر کا گھیراؤ کئے رکھا ، 40 دِن آپ رَضِیَ اللّٰہُ عَنْہُ مَشقَّت میں  رہے ، 40 دِن روزے رکھتے رہےاور آخر کار ظلم سہتے ہوئے ، جامِ شہادت نوش فرمایا ، آخری وقت بھی آپ قرآنِ کریم کی تلاوت میں مَصْرُوف تھے۔ ^([2])

رکھا محصُور ان کو ، بند ان پر کر دیا پانی        شہادت حضرت عثمان کی بےشک ہے لاثانی

خُدا بھی اور نبی بھی ، خود علی اس سے ہیں ناراض        عَدُو اُن کا اُٹھائے گا قیامت میں پریشانی^([3])

پیارے اسلامی بھائیو ! سیرتِ عثمانِ غنی رَضِیَ اللّٰہُ عَنْہُ کے اس پہلو سے معلوم ہوا کہ جو اللہ پاک سے محبت کرنے والا ہوتا ہے وہ اللہ پاک کی بارگاہ میں حاضِری کا ، اللہ پاک سے ملاقات کا بہت شوق رکھتا ہے ، حدیثِ پاک میں ہے : مَنْ اَحَبَّ لِقَاءَ اللہ اَحَبَّ اللہ لِقَائَہٗ جو اللہ پاک سے ملاقات کا شوق رکھتا ہے ، اللہ پاک اس سے ملاقات کو پسند فرماتا ہے۔ ^([4])

مُفَسِّرِ قرآن ، حکیم الامت مفتی احمد یار خان نعیمی رَحمۃُ اللہ عَلَیْہ اس حدیثِ پاک کے تحت فرماتے ہیں : اس حدیثِ پاک میں اللہ پاک کی ملاقات سے مراد موت ہے  کیونکہ موت ہی اللہ پاک سے ملاقات کا ذریعہ ہے مگر اللہ پاک سے ملاقات کو پسند کرنے کا یہ معنی نہیں