شیطان کے خلاف جنگ                     جاری رہے گی اِنْ شَآءَ اللہ

            سیدی اعلیٰ حضرترَحْمَۃُ اللہِ عَلَیہ کےشہزادےمُفتیِ اعظم ہندحضرت علامہ مولانا مصطفیٰ رضا خان رَحْمَۃُ اللہِ عَلَیہ عاجزی کرتےاورہمیں سمجھاتے ہوئے فرماتے ہیں۔

نَفْسِ بدکار نے دل پہ یہ قِیامَت توڑی                           عملِ نیک کِیا بھی تو چھپانے نہ دِیا

 (سامانِ بخشش،ص۶۱)

صَلُّوْا عَلَی الْحَبِیْب!                                   صَلَّی اللّٰہُ  عَلٰی مُحَمَّد

       پیارے پیارے اسلامی بھائیو!ریاکاری سے بچنےکےلئےعِبادَت کے دوران بھی شیطانی وَسْوَسوں سے بچنے کی کوشش کریں، کیونکہ شیطان مُسلسل ہمارے دل میں وَسوَسے ڈالنے کی کوشش میں لگا رہتا ہے،لہٰذا جس طرح نیک عمل سے پہلے دل میں اِخْلاص ہونا ضَروری ہے،اِسی طرح ہر نیکی وعِبادَت کے دَوران اسے قائم رکھنا بھی ضَروری ہے۔

       اگرچہ اس طرح سوچنااور غور و فکر کرنا بہت مُشکل کام ہے مگر ناممکن نہیں،آغاز میں یہ کام بے حدمُشکل محسوس ہوتا ہے،لیکن جب کوشش کر کےایک عرصے تک اس پر صبرکرے تو اللہپاک کے فَضْل وکرم اور حُسنِ توفیق سے یہ کام آسان ہوجاتا ہے،ہمارا کام کوشِش کرنا ہے،کامیابی دینے والی ذات رَبِّ کائنات کی ہے۔ (نیکی کی دعوت، ص۹۴)

       آئیے!اپنے ربّ کریم کی بارگاہ میں دعا کرتے ہیں اور اِخلاص کی بھیک مانگتے ہیں۔

بنادے مجھ کو الٰہی خُلوص کا پیکر                                   قریب آئے نہ میرے کبھی رِیا یارَبّ!

اَندھیری قَبْر کا دل سے نہیں نکلتا ڈر                              کروں گا کیا جو تُو ناراض ہو گیا یارَبّ!

(وسائلِ بخشش، ص ۷۸)