نوجوانوں کی اِصلاح اور دعوتِ اسلامی کا کردار

میٹھے میٹھے اِسلامی بھائیو!اِس پُرفِتَن دَور میں سُنّتوں سے دُور،حِرص و لالچ کے نَشے میں چُور اور نفس وشیطان کے ہاتھوں مجبورہوکرگُناہوں کے سیلاب میں بہنے والے نوجوانوں کی اِصْلاح اوراَخْلاقی تَربِیَت کیلئے عاشقانِ رسول کی مدنی تحریک دعوتِ اسلامی  کے تحت  63روزہ مدنی تَربیتی کورس بھی ہوتا ہے۔اس کورس کی اَہَمیَّت کے مُتَعَلِّق شیخِ طریقت، اَمِیْرِ اَہلسُنَّت دَامَتْ بَـرَکاتُہُمُ الْعَالِیَہ   فیضانِ سُنَّت،جلد اوّل صفحہ 510پر فرماتے ہیں:

اَلْحَمْدُ لِلّٰہ!عاشِقانِ رسول کی صحبتوں سے مالا مال 63روزہ (مدنی)تربیتی کورس آخِرت کیلئے اِس قَدَر نَفع بخش ہے کہ اس میں جو کچھ سیکھنے کو ملتا ہے، اُس کی تفصیلات معلوم ہوجانے کے بعد شاید دِین کا دَرد رکھنے والا ہر مُسلمان یہ حسرت کریگا کہ کاش! مجھے بھی63روزہ(مدنی)تربیتی کورس کرنے کی سعادت حاصِل ہو جائے!اَلْحَمْدُ لِلّٰہ!بابُ المدینہ (کراچی )کےعلاوہ دِیگر شہروں میں بھی(مدنی) تربیتی کورس کا سلسلہ کیا جاتا ہے۔اِس میں بعض وہ عُلُوم حاصِل ہوتے ہیں،جن کا سیکھنا ہر عاقِل، بالِغ مسلمان پر فرض ہے۔اَلْحَمْدُ لِلّٰہ!(مدنی)تربیتی کورس میں(اخلاقی تربیت کے ساتھ ساتھ ) وُضو و غسل کے علاوہ نماز کا عملی طریقہ سکھایا جاتا، غسلِ میّت،تَجْہِیز و تَکْفِین، نمازِ جنازہ و نمازِ عید کی تَربِیَت ہوتی ہے۔ مدنی قاعدہ کے ذَرِیعے دُرُست مَخارِج کے ساتھ قرآنی حُروف کی اَدائیگی کی تعلیم دی جاتی ہے اور قرآنِ کریم کی آخِری 20سُورَتیں زَبانی حِفظ اور سُوْرَۃُ المُلک کی مَشْق کروائی جاتی ہے۔ اَلْحَمْدُ لِلّٰہ! اس کی برکت سے بہت سے نوجوان،دعوتِ اسلامی کے مَدَنی ماحول سے وابستہ ہوچکے ہیں اور اُن کی بے رونق زندَگیوں میں مَدَنی بہاریں آ گئیں اور وہ اپنی جوانی کے پُر بہار اَیّام ،اللہ پاک اوراس کے پیارے رسول صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ  کے نام پر وقْف کر کے اِس مدَنی مقصَد کہ ’’مجھے اپنی اور ساری دُنیا کے لوگوں کی اِصلاح کی کوشِش کرنی ہے“کو عام کرنے والے بن گئے۔

صَلُّوْا عَلَی الْحَبِیْب!                          صَلَّی اللّٰہُ تَعَالٰی عَلٰی مُحَمَّد

رسالہ”جوانی کیسے گزاریں؟“ کا تعارُف