فرمایا:میں تمہیں شبِ قدربتانےآیاتھامگر فُلاں فُلاں لڑپڑے توشبِ قدر  کی تَعْیِیْن اُٹھالی گئی،ممکن ہے یہ اُٹھالیا جانا تمہارےلئے بہترہی ہو،اب اُسے(رمضان المبارک کی)آخری نویں،ساتویں،پانچویں (رات) میں تلاش کرو۔(بخاری ،کتاب فضل لیلۃالقدر،باب رفع معرفۃلیلۃالقدر۔۔۔الخ ،  ۱/۶۶۲حدیث:۲۰۲۳)

حکیمُ الاُمّت حضرت مفتی احمد یار خان رَحْمَۃُ اللّٰہ ِتَعَالٰی عَلَیْہ اِس حدیثِ پاک کے تحت لکھتے ہیں:اِن جھگڑنے والوں کا جھگڑا ناحق بھی تھا اور اِعتدال سےزیادہ بھی جس کا اثر یہ ہوا۔معلوم ہوا کہ دنیاوی جھگڑے  مَنحوس ہیں اِن کاوبال بہت ہی زیادہ ہےاِن کی وجہ سےاللہ پاک کی آتی ہوئی رحمتیں رُک جاتی ہیں۔ (مرآۃ المناجیح،۳/ ۲۱۰ملخصاً)

آئیے!ہم سب نِیَّت کر یں کہ لڑائی جھگڑا نہیں کریں گی،لڑتےجھگڑتے مسلمانوں میں صُلح کروانے کی سُنّت پر عمل کی کوشش کریں گی ،اگر کوئی ہمیں غُصّہ دلائے گا تو صبرکریں گی ، لڑائی جھگڑے  کی آگ بھڑکانے والے کاموں مثلاً جُھوٹ،غیبت،چُغلی،حسد،تکبر،وعدہ خلافی،خواہ مخواہ کی ضد،کنجوسی، بے عزتی،بے حسی،چیخنے چلانے،گالی گلوچ،نکتہ چینی،تَعَصُّب اور ظُلْم کرنے سے بچیں گی ،اگر کوئی ہمیں لڑنے پر اُبھارے گا تو بھی ہم اپنے آپ کو لڑائی سے دور رکھ کر شیطان کو ناکام و نامراد کردیں گی اوریہ مدنی سُوچ پانے کے لئے عاشقانِ رسول کی مدنی تحریک دعوتِ اسلامی کے مدنی ماحول سے وابستہ رہیں گی ۔اِنْ شَآءَ اللہ عَزَّ  وَجَلَّ

ہے کرم اِس پر خدائے پاک کا                           دعوتِ اسلامی سے یُوں پیار ہے

اِس پہ ہے نظرِ کرم سرکار کی                              دعوتِ اسلامی سے یُوں پیار ہے

(وسائل بخشش مرمم،ص۷۰۱)

صَلُّوْا عَلَی الْحَبِیْب!                                            صَلَّی اللّٰہُ تَعَالٰی عَلٰی مُحَمَّد