وزن کے برابر چاندی صَدَقہ کی جائے ۔

 ( تاریخ الخلفاء ،  باب الحسن بن علی بن ابی طالب ،  ص۱۴۹و روضۃ الشھداء  ( مترجم ) ، باب ششم ، ۱/۳۹۶ )

آپ ( رَضِیَ اللہ  عَنْہُ ) کا نام ، اِمامُ الْانبیاء ، سَیِّدُالاَسْخِیاء صَلَّی اللہ  عَلَیْہِ واٰلہٖ وسلَّم نے رکھا۔مکمل واقِعہ کچھ یُوں ہے کہ حضرت اسماء بنتِ عُمیس رَضِیَ اللہ  عَنْہانے بارگاہِ رِسالَت میں حضرت   امام حَسن رَضِیَ اللہ  عَنْہُ کی وِلادت کی خوشخبری سنائی۔  ( تو ) حُضُورپُرنُور ، شافعِ یوم النُّشور صَلَّی اللہ  عَلَیْہِ واٰلہٖ وسلَّم تشریف لائے اورفرمایا :  اسماء ! میرے فرزندکو لاؤ ، حضرت اسماء رَضِیَ اللہ  عَنْہَا نے ( امامِ حسن رَضِیَ اللہ  عَنْہُ کو )  ایک کپڑے میں ( لپیٹ کر )  حُضور سَیِّد ِ عالم  صَلَّی اللہ  عَلَیْہِ واٰلہٖ وسلَّم کی خدمت میں حاضر کیا۔آپ  صَلَّی اللہ  عَلَیْہِ واٰلہٖ وسلَّم نے سیدھی طرف والےکان میں اَذان اوراُلٹی طرف والے کان میں تکبیر فرمائی اورحضرت   مولیٰ علیُّ الْمُرتَضٰی رَضِیَ اللہ  عَنْہُ سے دریافت فرمایا :  تم نے اس شان و شوکت والے بیٹے کاکیا نام رکھا ہے ؟ عرض کی : یَارَسُوْلَ اللہ صَلَّی اللہ  عَلَیْہِ واٰلہٖ وسلَّم  ! میری کیا مَجال کہ بے اِجازت نام رکھنے پر پہل کرتا ، لیکن اب جو دریافت فرمایاہے تو میرا خیال ہے ’’حَرْب ‘‘نام رکھاجائے ، باقی حُضُور صَلَّی اللہ  عَلَیْہِ واٰلہٖ وسلَّم مُختار ہیں۔تو آپ  صَلَّی اللہ  عَلَیْہِ واٰلہٖ وسلَّم نے ان کانام حَسن رکھا۔ ( سوانحِ کربلا ص۹۲ملخصاً )  

آپ رَضِیَ اللہ  عَنْہُ کےچھوٹے بھائیسَیِّدُالشُّہَداء ، راکبِ دَوشِ مُصْطَفٰے ،  حضرت   امام حسین  رَضِیَ اللہ  عَنْہُ کی وِلادت5شعبانُ  المعظم سن 4 ہجری کو مدینۂ مُنوَّرہ میں ہوئی۔آپ رَضِیَ اللہ  عَنْہُ کا نام ، حُضُور پرنور ، شافع ِ یومُ النُّشور صَلَّی اللہ  عَلَیْہِ واٰلہٖ وسلَّم نے  ” حُسین “  اور  ” شبیر “ رکھا جبکہ آپ رَضِیَ اللہ  عَنْہُ کی کُنْیَت’’اَبُوعَبدُاللہ‘‘اور آپ رَضِیَ اللہ  عَنْہُ کالَقب بھی  ” سِبۡطُ رَسُوۡل “ اور  ” رَیْحَانَۃُ الرَّسُوْل “  ( رسول صَلَّی اللہ  عَلَیْہِ واٰلہٖ وسلَّم کا پھول ) ہے ، اپنے بڑے بھائی کی طرح آپ  رَضِیَ اللہ  عَنْہُ بھی جنَّتی جوانوں کےسردار ہیں۔

 ( اسد الغابة ، باب الحاء والحسین ، ۱۱۷۳۔ الحسین بن علی ، ص ۲۵ ،  ۲۶ملتقطاًوسیر اعلام النبلاء ،  ۲۷۰۔ الحسین الشہید...الخ ،  ۴ /۴۰۲۔۴۰۴ )