ہے۔چُنانچہ 

نبیِّ رَحمت ، شَفیعِ اُمَّت  صَلَّی اللہ  عَلَیْہِ واٰلہٖ وسلَّم کا فرمانِ عالیشان ہے : ’’لَا یُوْمِنُ عَبْدٌحَتّٰی اَکُوْنَ اَحَبَّ اِلَیْہِ مِنْ نَفْسِہٖ ‘‘یعنی کوئی بندہ مومنِ کامل نہیں ہوسکتا ،  جب تک کہ مجھے اپنی جان سے بڑھ کر نہ چاہے ’’وَذَاتِیْ اَحَبَّ اِلَیْہِ مِنْ ذَاتِہِ‘‘اور میری ذات ، اُسے اپنی ذات سے بڑھ کر محبوب نہ ہو ’’وَتَکُوْنَ عِتْرتِیْ  اَحَبَّ اِلَیْہِ مِنْ عِتْرَتِہِ ‘‘اور میری اَوْلاد اس کو اپنی اولاد سے زِیادہ پیاری نہ ہو’’وَاَہْلِیْ اَحَبَّ اِلَیْہِ مِنْ اَہْلِہِ ‘‘اور میرے اَہْلِ بیت (  رَضِیَ اللہ  عَنْہُم اجمعین ) اسے اپنےگھروالوں سے بڑھ کر محبوب نہ ہو جائیں۔ ( شعب الایمان ،  باب فی حب النبی ،  ۲/۱۸۹ ، حدیث :  ۱۵۰۵بتصرف  ما )

اَہْلِ بیتِ اَطْہار رَضِیَ اللہ  عَنْہُم اجمعین کے فضائل

پیارے پیارے اسلامی بھائیو ! اَہْلِ بیتِ اَطْہار عَلَیْہِمُ الرِّضْوَان   کی شان میںاللہ کریم پارہ 22 ،  سُوْرَۃُ الْاَحْزَاب کی آیت نمبر 33 میں ارشاد فرماتاہے :

اِنَّمَا یُرِیْدُ اللّٰهُ لِیُذْهِبَ عَنْكُمُ الرِّجْسَ اَهْلَ الْبَیْتِ وَ یُطَهِّرَكُمْ تَطْهِیْرًاۚ(۳۳)   ( پ ۲۲ ، احزاب ، ۳۳ )

ترجمۂ کنز العرفان : اے نبی کے گھر والو ! اللہ تو یہی چاہتا ہے کہ تم سے ہر ناپاکی دور فرما دے اور تمہیں  پاک کرکے خوب صاف ستھرا کردے۔

اکثر مُفَسِّرینِ کرام   رَحْمَۃُ اللّٰہ ِ عَلَیْہم اجمعین کی رائے ہے کہ یہ آیتِ مُبارَکہ حضرتِ   عَلیُّ المُرْتَضیٰ ، حضرت فاطِمہ زَہرا ، حضرتِ  امام حَسَن اورحضرتِ  امام حُسَین  رَضِیَ اللہ  عَنْہُم اجمعین کےحق میں نازِل ہُوئی۔حضرت   امام احمد رَحْمَۃُ اللّٰہ  عَلَیْہِ نے حضرت   ابُوسَعید خُدْری رَضِیَ اللہ  عَنْہُ  سے رِوایَت کی ہے کہ یہ آیَت پَنجتَن پاک کی شان میں نازِل ہوئی۔ پَنجتَن سے مُراد حُضُور نبیِ کَریم صَلَّی اللہ  عَلَیْہِ واٰلہٖ وسلَّم  ، حَضرتِ عَلی ،  حضرت فاطمہ ،  حضرت ِامام حَسَن اور حضرت ِامام حُسَین  رَضِیَ اللہ  عَنْہُ م ہیں۔ ( سوانح کربلا ،  ص۷۹ ، ۸۰ ، ملتقطا )