صَلُّوْا عَلَی الْحَبِیْب !                                            صَلَّی اللہ عَلٰی مُحَمَّد

فرمانِ مصطفےٰ صَلَّی اللہ عَلَیْہِ وَاٰلِہٖ وَسَلَّم  : اَفْضَلُ الْعَمَلِ اَلنِّيَّۃُ الصَّادِقَۃُ سچی نیت سب سے افضل عمل ہے۔   ⁽ [1] ⁾   اے عاشقانِ رسول !  ہر کام سے پہلے اچھی اچھی نیتیں کرنے کی عادت بنائیے کہ اچھی نیت بندے کو جنت میں داخِل کر دیتی ہے۔ بیان سننے سے پہلے بھی اچھی اچھی نیتیں کر لیجئے ! مثلاً نیت کیجئے !   * عِلْم سیکھنے کے لئے پورا بیان سُنوں گا  * با اَدب بیٹھوں گا  * دورانِ بیان سُستی سے بچوں گا   * اپنی اِصْلاح کے لئے بیان سُنوں گا   * جو سُنوں گا دوسروں تک پہنچانے کی کوشش کروں گا۔

صَلُّوْا عَلَی الْحَبِیْب !                                            صَلَّی اللہ عَلٰی مُحَمَّد

اَلْحَمْدُ لِلّٰہ ! مُحَرَّمُ الْحَرام شَرِیْف کا بابرکت مہینا جاری وساری ہے ، اس مُبا رَک مہینے کو اَہلِ بیتِ اَطْہار رَضِیَ اللہ عَنْہُ م اجمعین اور اِمامِ عالی مَقام ، امامِ تِشنہ کام حضرت اِمامِ حسن مُجتبیٰ اور امامِ حُسین  رَضِیَ اللہ عَنْہُ ما کے ساتھ ایک خاص نسبت ہے ، آئیے ! اسی حوالے  سے  حَسَنَیْنِ کَرِیْمَیْن  رَضِیَ اللہ عَنْہُ مَا  کی شان وَعَظمت کے بارے میں سُنْنے کی سَعادَت حاصِل کرتے ہیں۔نبیِّ کریم صَلَّی اللہ عَلَیْہِ واٰلِہٖ وَسَلَّمَ اِن دونوں شَہزادوں سے بہت مَحَبَّت فرماتے جیساکہ

حضرت اَنس بن مالک رَضِیَ اللہ عَنْہُ  فرماتے ہیں ، رَسُوْلُ اللہ صَلَّی اللہ عَلَیْہِ وَاٰلِہٖ وَسَلَّم سے عَرْض کی گئی کہ اہلِ بیت  رَضِیَ اللہ  عَنْہُم اجمعین میں آپ کو زِیادَہ پیارا کون ہے ؟ ارشاد فرمایا : حَسن اورحُسَین (  رَضِیَ اللہ عَنْہُ مَا ) ۔آپ صَلَّی اللہ عَلَیْہِ واٰلِہٖ وَسَلَّمَ ، حَضْرت فاطِمَۃُ الزَّہْرا رَضِیَ اللہ  عَنْہَا سے فرمایا کرتے کہ میرے بچوں کومیرے پاس بُلاؤ ، پھر اُنہیں سُونگھتے اوراپنےساتھ چِمٹا لیتے تھے۔   ( ترمذی ، كتاب المناقب عن رسول اللہ ، باب مناقب الحسن والحسین ،  ۵/ ۴۲۸حدیث : ۳۷۹۷ )