سرکا ر صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ کا قُرب پانے والا خُوش نصیب

            حضرت سَیِّدُناابنِ عباس  رَضِیَ اللّٰہُ تَعَالٰی عَنْہُمَا  سے روایت ہے کہ نبیِّ پاک،    صاحبِ لَولاک صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ نے فرمایا: ’’جوشخص میرے صحابہ،    اَزواج اور اَہْلِ بیت  (رَضِیَ اللّٰہُ تَعَالٰی عَنْہُم اجمعین)  سے عَقیدت رکھتا ہے،   ان میں سے کسی پرطَعْن نہیں کرتا اور ان کی مَحَبَّت پر دُنیا سے اِنتقا ل کرتا ہے،    وہ قیامت کے دن میرے ساتھ میرے دَرَجہ میں ہوگا۔   ‘‘  (الریاض النضرۃ،   الباب الاول،   ذکر ماجاء فی الحث علی حبہم والاحسان الیہم …الخ ،   ۱/۲۲)  

            مُحبانِ صحابہ کیلئے نِفاق سے آزادی کی خوشخبری بھی ہے چُنانچہ

            حضرت سَیِّدُنا انس رَضِیَ اللہُ تَعَالٰی عَنْہُ سے روایت ہے کہ سرکارِ نامدار،     شَہَنشاہِ اَبرار صَلَّی اللّٰہُ تَعَالٰی عَلَیْہِ واٰلِہٖ وَسَلَّمَ نے ارشاد فرمایا: ’’مَنْ اَحْسَنَ الْقَوْلَ فِیْ اَصْحَابِیْ فَقَدْ بَرِئَ مِنَ النِّفَاقِ‘‘یعنی جس نے میرے اَصحاب کے مُتعلِّق اچھی بات کہی تو وہ نفاق سےآزاد ہوگیا۔     (الریاض النضرۃ،    الباب الاول ،   ذکر ماجاء فی الحث علی حبہم والاحسان الیہم …الخ ،   ۱/۲۲)  

صَلُّو ْا عَلَی الْحَبِیْب!                                        صَلَّی اللہُ تَعَالٰی عَلٰی مُحَمَّد

انگوٹھی پہننے کی سُنتیں و آداب

میٹھے میٹھے اسلامی  بھائیو! بَیان کو اِخْتِتام کی طرف لاتے ہوئے آئیے! شَیْخِ طَرِیْقت،   اَمِیْرِ  اَہلسُنَّت دَامَتْ بَـرَکاتُہُمُ الْعَالِیَہ کے رِسالے’’163 مَدَنی پُھول‘‘سے انگوٹھی پہننے  کی چند سُنّتیں اور آداب سُنتے ہیں۔   ٭ مرد کو سونے کی اَنگوٹھی پہننا حرام ہے۔    سُلطانِ دو جہان،    رَحمتِ عالَمیان صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے سونے کی اَنگوٹھی پہننے سے مَنع فرمایا۔     (بخاری،   ۴   /  ۶۷،   حدیث: ۶۳۸۵)   ٭   (نابالِغ)  لڑکے کو سونے چاندی کا زَیور پہنانا حرام ہے اور جس نے پہنایا وہ گنہگار ہوگا۔     (بہارِ شریعت،   ۳/۴۲۸،   دُرِّمُختارو رَدُّ الْمُحتار،    ۹/۵۹۸)  ،   ٭ لوہے کی اَنگوٹھی جَہنَّمیوں کا زیور ہے۔     (ترمذی،    ۳/ ۳۰۵،   حدیث: ۱۷۹۲)  

صَلُّوْا عَلَی الْحَبِیْب!                                        صَلَّی اللّٰہُ تَعَالٰی عَلٰی مُحَمَّد