Book Name:Bad Fajar Madani Halqa

صَلُّوا عَلَی الْحَبیب!      صَلَّی اللّٰہُتَعَالٰی عَلٰی مُحَمَّد

سُنّت کو زندہ کرنے کی کوشش

میٹھے میٹھے اِسْلَامی بھائیو!اَفْسَوس!صد اَفْسَوس!ایک تعداد ہے جو حُبِّ دُنیا کی مستی میں سرشار ، فِکْرِ آخِرَت سے غافِل اور ہر وَقْت مال و دولت بڑھانے کے سُہانے خواب دیکھنے میں مَصْرُوف ہے۔بارگاہِ خُداوندی سے عِشْقِ رسول کی لازوال دولت مانگنے کے بجائے نفس و شیطان کے ہاتھوں میں کھلونا بنے بیٹھے ہیں۔جدھر دیکھئے! بس نفسا نفسی کا ہی عالَم ہے ، چُنَانْچِہ اس پُرْفِتَن دَور میں پندرھویں صدی کی عظیم عِلْمی و رُوحانی شَخْصِیَّت ، شَیخِ طَرِیْقَت ، اَمِیرِ اَھْلِسُنّت ، بانِیِ دَعْوَتِ اِسْلَامی حضرت علّامہ مولانا ابو بِلال محمد اِلْیَاس عطّار قادِری رَضَوِی ضِیائی دَامَتْ بَرَکاتُہُمُ الْعَالِیَہ کے زیرِ سرپرستی تَبْلِیغِ قرآن و سنّت کی عالمگیر غیر سیاسی تحریک دَعْوَتِ اِسْلَامی ان سنتوں کو جن پر فی زمانہ عَمَل چھوڑ دیا گیا ہے ، زندہ کرنے کی کوشش میں مَصْرُوفِ عَمَل ہے۔دیگر مَدَنی کاموں کے ساتھ ساتھ اس کے پیشِ نَظَر بعدِ فَجْر تا اِشْرَاق کا وَقْت بھی ہے اور اس وَقْت کو سنّت کے مُطابِق کارآمد بنانے کے لئے دَعْوَتِ اِسْلَامی نے اس میں اپنے ذیلی حلقے کے 12 مدنی کاموں میں سے ایک مدنی کام بنام بَعْدِ فَجْر مَدَنی حَلَقَہ شروع کر رکھا ہے۔بعدِ فَجْر تا اِشْرَاق و چاشت کے وَقْت کو بھی دُرُسْت اِسْتِعمال کرنے اور اِس وَقْت میں ذِکْرُ اللہ(تِلاوَتِ قرآن ، ترجمہ و تفسیر ، عِلْمِ دین سے مالا مال دَرْسِ فیضانِ سُنّت وغیرہ)کر کے دُنیا و آخِرَت کی برکتوں کو سمیٹنے کے لئے دَعْوَتِ اِسْلَامی کے مَدَنی مَاحَول نے بَہُت پیارے انداز میں ہماری رَاہ نُمائی کی ہے۔دُنیا بھر کی ہزارہا مَسَاجِد میں عاشقانِ رسول کو اس کی ترغیب دِلائی جاتی ہے اور باقاعدہ منظّم انداز سے جَدْوَل و مَدَنی مَرْکَز کے طَریْقِ کار کے مُطابِق یہ وَقْت گزارنے یعنی بَعْدِ فَجْر مَدَنی حَلَقَہ لگانے کی کوشش کی جاتی ہے۔

بعدِ فجر مدنی حلقہ کیا ہے؟

دَعْوَتِ اِسْلَامی کے مَدَنی مَاحَول میں بَعْدِ فَجْر مَدَنی حَلَقَہ سے مُراد یہ ہے کہ روزانہ بعدِ فَجْر تا اِشْرَاق و چاشت قرآنِ پاک سے تین۳ آیات کی تِلاوَت مع ترجمۂ کنز الایمان شریف اور تفسیر صِرَاطُ الْـجِنَان  / خَزَائِنُ الْعِرْفَان / نُوْرُ الْعِرْفَان سے انہی آیات کی تفسیر دیکھ کر سُنائی جاتی ہیں اور اسکے ساتھ ساتھ فیضانِ سنّت کے ترتیب وار 4 صفحات اور مَنْظُوم شجرہ شریف پڑھنے کے بعد دُعا کی بھی ترکیب ہوتی ہے۔(بہتر ہے کہ نِگرانِ ذیلی حلقہ مُشَاوَرَت /  ذیلی ذِمَّہ دار مَدَنی اِنْعَامَات / جَامِعَةُ الْـمَدِیْنَه  کے مُدرسین وطلبۂ کِرام / مَدْرَسَةُ الْـمَدِیْنَه للبنین /  مَدْرَسَةُ الْـمَدِیْنَه آن لائن کے ناظمین و قاری صاحبان بھی بَعْدِ فَجْر مَدَنی حَلَقَہ لگائیں۔)

تنظیمی طور پر مدنی حلقہ کس کے ذِمّےہے؟

تنظیمی طور پر بَعْدِ فَجْر مَدَنی حَلَقَہ لگانا اور اس کا اِہتِمام کرنا مَجْلِس مَدَنی اِنْعَامَات کے ذِمَّہ داران کے سُپُرد ہے۔

مدنی حلقے کا طریقہ

نَمازِ فَجْر کی دُعا کے بعد مُبَلِّغ اِسْلَامی بھائی مَسْجِد کے ایک طرف مَدَنی حلقے کی اس طرح ترکیب فرمائیں :

٭ تین۳ بار اس طرح اِعلان فرمائیے : قریب قریب تشریف لائیے۔پردے میں پردہ کئے دوزانو بیٹھ کر اس طرح اِبْتِدَا کیجئے :

اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ط  بِسْمِ اللہِ الرَّحْمٰنِ الرَّ حِیْم ط

٭ اِس کے بعد اِس طرح دُرُود و سلام پڑھائیے :

اَلصَّلٰوۃُ وَالسَّلَامُ عَلَیْکَ یَا رَسُوْلَ اللہ                                        وَ عَلٰی اٰلِکَ وَ اَصْحٰبِکَ یَا حَبِیْبَ اللہ

اَلصَّلٰوۃُ وَالسَّلَامُ عَلَیْکَ یَا نَبِیَّ اللہ         وَ عَلٰی اٰلِکَ وَ اَصْحٰبِکَ یَا نُورَ اللہ

٭ پھر اس طرح اِعْتِکَاف کی نِیَّت کروائیے : نَوَیْتُ سُنَّتَ الْاِعْتِکَاف (ترجمہ : میں نے سُنَّتِ اِعْتِکَاف کی نِیَّت کی)۔

٭ 3 آیات کی تِلاوت مع ترجمۂ کنزالایمان اور صِرَاطُ الْجِنَان / خَزَائِنُ الْعِرْفَان / نُورُ الْعِرْفَان سے دیکھ کر ان کی تفسیر بیان کی جائے۔

٭ اگر صِرَاطُ الْـجِنَان میں کسی مَقام پر تفسیر طویل ہو تو عام طور پر 3 آیات کے مُطابِق جس قَدْر صفحات بنتے ہوں اسی قَدْر پڑھ لیجئے۔

٭ پھر دوبارہ خطبہ پڑھے بغیر فیضانِ سنّت کے ترتیب وار 4 صفحات پڑھ کر سنائیے۔

٭ اس کے بعد اجتماعی طور پر شجرۂ قادریہ رضویہ عطاریہ (مَنْظُوم)پڑھا جائے۔ (چاہے طرز میں پڑھیں یا بغیرطرز کے )

٭ اِشْرَاق و چاشت میں اگر کچھ وَقْت باقی ہو تو شجرۂ شریف کے اوراد و وظائف کی ترکیب بنا لی جائے۔

 



Total Pages: 15

Go To