Book Name:Fatawa Razawiyya jild 9

پیش لفظ

الحمدُﷲ اعلٰی حضرت امام المسلمین مولٰینا الشاہ احمدرضاخان فاضل بریلوی رحمۃ اﷲ علیہ کے خزائن علمیہ وذخائر فقہیہ کو جدیدانداز میں عصرحاضر کے تقاضوں کے مطابق منظرعام پرلانے کے لئے دارالعلوم جامعہ نظامیہ رضویہ لاہور"رضا فاؤنڈیشن"کے نام سے جو ادارہ چندسال قبل قائم ہوا تھا وہ انتہائی برق رفتاری کے ساتھ مجوزہ منصوبہ کے ارتقائی مراحل کو طے کرتے ہوئے اپنے ہدف کی طرف بڑھ رہاہے۔ کتاب الطہارۃ اور کتاب الصلوٰۃ چارچار خوبصورت مجلدات میں آپ تك پہنچ چکی ہیں اب بفضلہ تعالٰی جل مجدہ  وبعنایۃ رسولہ الکریم صلی اﷲ علیہ وسلم نویں جلد پیش کی جارہی ہے۔

جلد نہم

یہ جلد فتاوٰی رضویہ (قدیم) کی جلدچہارم کے شروع باب الجنائز سے کتاب الزکوٰۃ تك ٢٧٣ سوالوں کے جوابات پرمشتمل ہے۔ اس جلد کی عربی وفارسی عبارات کا ترجمہ فاضل جلیل، محقق شہیر، صاحب تصانیف کثیرہ، ماہرعلوم قدیمہ وجدیدہ حضرت علامہ مولٰینا محمداحمدمصباحی دامت برکاتہم العالیہ شیخ الادب جامعہ اشرفیہ مبارکپور (بھارت) نے فرمایا۔ باب التیمم (جوجلدسوم وچہارم میں شائع ہوچکاہے) کا ترجمہ بھی انہی کے رشحات قلم کانتیجہ ہے۔ جلدچہارم قدیم میں باب الجنائز کی ترتیب چونکہ طبعی نہ تھی لہٰذا اس جلد کی کتابت سابق ترتیب سے ہٹ کر طبعی ترتیب کے مطابق کرائی گئی ہے۔

باب الجنائز کے مسائل کو سابقہ ترتیب غیرطبعی سے موجودہ ترتیب طبعی کی طرف منتقل کرنا بھی علامہ مصباحی صاحب کی محنت شاقہ کاثمرہے۔ علاوہ ازیں اس جلد میں شامل رسائل کی مفصل فہرست بھی افادۂ قارئین کے لئے دے دی گئی ہے


 

 



Total Pages: 948

Go To