صحابی رَضِیَ اللہُ عَنْہ اس سُورت کی تِلاوت کر رہے تھے ، پیارے آقا ، مکی مدنی مصطفےٰ صَلَّی اللہُ عَلَیْہِ وَاٰلِہٖ وَسَلَّم اوروہاں موجود صَحابہ کرام عَلَیْہِمُ الرِّضْوَان سُن رہے تھے ، وہ صحابی خود بھی رو رہے تھے ، حُضُور اقدس صَلَّی اللہُ عَلَیْہِ وَاٰلِہٖ وَسَلَّم کی مبارک آنکھوں سے بھی آنسو جاری تھے اور وہاں موجود صحابۂ کرام عَلَیْہِمُ الرِّضْوَان بھی رَو رہے تھے ، یمنی صحابی رَضِیَ اللہُ عَنْہ  نے “ سُوْرَۃُ التَّکَاثُر “ پُوری پڑھی ، پھر عرض کیا : یارسولَ اللہ صَلَّی اللہُ عَلَیْہِ وَاٰلِہٖ وَسَلَّم! میرے لئے دُعا فرمائیے! پیارے آقا ، اَحْمَد مجتبیٰ صَلَّی اللہُ عَلَیْہِ وَاٰلِہٖ وَسَلَّم نے اُن کے لئے دُعا فرمائی : اَللّٰہُمَّ اغْفِرْ لَہٗ الْکَثِیْر  یااللہ! اس کی بہت مغفرت فرما ، وَاشْکُرْہٗ عَلَی الْیَسِیْر اسے تھوڑے پر شکر کرنے والا بنا ، وَاغْنِہٖ بِرَحْمَتِکَ اور اسے اپنی رَحْمت سے مالا مال  فرما۔

اس واقعہ کو ایک ہفتہ ہی گزرا تھا کہ بارگاہِ رسالت میں عرض کیا گیا : یا رسول اللہ صَلَّی اللہُ عَلَیْہِ وَاٰلِہٖ وَسَلَّم! وہ نوجوان صَحَابی رَضِیَ اللہُ عَنْہ دُنیا سے رخصت ہو گئے ہیں۔ حُضُور اقدس صَلَّی اللہُ عَلَیْہِ وَاٰلِہٖ وَسَلَّم نے کلمہ طیبہ پڑھا اور فرمایا :  تجہیز و تکفین سے فارغ ہو کر مجھے خبر دو! جب جنازہ تیار ہوا ، بارگاہِ رسالت میں عرض کی گئی ، آپ تشریف لائے ، نمازِ جنازہ پڑھائی اور اس صحابی رَضِیَ اللہُ عَنْہ کو مخاطب کر کے فرمایا : ھَنِیْئًا لَکَ الْجَنَّۃَاے نوجوان! تجھے جنت مبارک ہو۔ ^([1])

یوں میرا دُنیا سے سَفَر ہو                      اُن کی چوکھٹ ، میرا سَر ہو

پیشِ نظر ہو اُن کا جلوہ                          یا اللہ! مری جھولی بھر دے

تاج وتخت وحکومت مت دے              کَثْرتِ مال ودولت مت دے

اپنی رضا کا دیدے مژدہ                       یااللہ! مری جھولی بھر دے!^([2])

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد