(1): د مسجدِ نبوي د توسیع په بدل کښې جَنَّت

هُم دغه شان يو ځل د مسجدِ نبوي شريف توسيع کول وو، په خوا کښې ئې د زمکې يوه ټکړه وه، مالکِ جَنَّت، قاسم نعمت صَلَّى اللهُ عَلَيْهِ وَاٰلِهٖ وَسَلَّم د دې پلاټ په جمات کښې شاملولو باندې د جَنَّتي کور زيرے واورولو، څنګه چې حضرت عثمانِ غني رَضِىَ اللهُ عَـنْهُ د دې نه خبر شو، هغوئي زر د هغه پلاټ د مالک خوا له لاړلو، پلاټ ئې واخستو او د مسجدِ نبوي شريف د پاره ئې وقف کړو. ^([1])

(2): د کجورو د باغ په بدل کښې ئې جَنَّت واخستو

روايت دے: په مدينۀ پاک کښې د بَنُو نَجّار د کجورو يو باغ وو، سرکارِ عالي وقار، مکي مدني تاجدار صَلَّى اللهُ عَلَيْهِ وَاٰلِهٖ وَسَلَّم اوفرمائيل: څوک دے چې دا باغ واخلي او جُمات ترينه جوړ کړي؟ هغه وخت هم حضرت عثمانِ غني رَضِىَ اللهُ عَـنْهُ راوړاندې شو، هغه باغ ئې واخستو او جُمات ئې ترينه جوړ کړو، په دې باندې مالکِ جَنَّت نبي، رسولِ هاشمي صَلَّى اللهُ عَلَيْهِ وَاٰلِهٖ وَسَلَّم هغوئي سره د جَنَّتي باغ وعده اوفرمائيله. ^([2])

سُبْحٰنَ اللہ! د حضرت عثمانِ غني رَضِىَ اللهُ عَـنْهُ څومره ښکلے شان دے. د هغوئي د جُمات جوړولو سره څومره شوق وو، چې د مسجدِ حرام شريف د فراختيا ضرورت شو حضرت عثمانِ غني رَضِىَ اللهُ عَـنْهُ ځائے پيش کړو، چې د مسجدِ نبوي شريف د فراختيا ضرورت شو نو هُم ځائے حضرت عثمانِ غني رَضِىَ اللهُ عَـنْهُ پيش کړو، د دې نه علاوه هم جُماتونه جوړول، د جُمات په جوړولو کښې برخه اخستل د هغوئي رَضِىَ اللهُ عَـنْهُ د پاکو صفتونو نه دي.