جُمات جوړول د انبياء سُنت دي

خوږو او محترمو اسلامي وروڼو! ياد ساتئ! جُمات جوړول سُنتِ انبياء دي. په دُنيا کښې 3 جُماتونه د ټولو نه افضل دي: (1) مسجدِ حرام (چرته چې کعبه شريفه ده) (2) مسجدِ نبوي شريف (3) مسجدِ اقصیٰ. دا درې واړه جُماتونه د الله پاک نبيانو عَـلَيْـهِمُ الـسَّـلَام  جوړ کړي دي. مسجدِ حرام په وړومبي ځل حضرت آدم عَلَیْهِ السَّلَام  جوړ کړو او د طوفانِ نُوح نه پس حضرت ابراهيم عَلَیْهِ السَّلَام جوړ کړو. د مسجدِ اقصیٰ د ټولو نه وړومبے بنياد حضرت يعقوب عَلَیْهِ السَّلَام کيښودو، وروستو حضرت سليمان عَلَیْهِ السَّلَام د دې تعمير پوره کړلو او د مسجدِ نبوي شريف خو ډير ښکلے شان دے چې دا مبارک جُمات د ټولو نه افضل نبي، رسولِ هاشِمي، مُحَمَّدِ عربي صَلَّى اللهُ عَلَيْهِ وَاٰلِهٖ وَسَلَّم په خپلو مبارکو لاسونو تعمير کړو.

کاش! مونږ ته هم د جُمات جوړولو توفيق رانصيب شي. * که الله پاک چا له وَس ورکړے وي نو پوره جُمات هم جوړول پکار دي، ډيره د سعادت خبره ده. * که څوک دومره وَس نه لري نو خير...!! چې الله پاک څومره وَس ورکړے وي د جُمات په جوړولو او د هغې په ترقئ کښې دې د خپل وَس مناسب برخه واخلي! * د جُمات جوړولو د پاره شَګه، سيمنټ وغيره راوړل، * په جُمات کښې ضرورتاً ټائلونه وغيره لګول، * د جُمات د اوداسه ځائے جوړول، * منبر جوړول، * د صفونو انتظام کول وغيره دا ټول د جُمات د جوړولو او ترقئ حصّه ده. په دې کښې د خپل وَس مطابق برخه لازمي اخستل پکار ده. په حديثِ پاک کښې دي: څوک چې د الله پاک د رضا د پاره جُمات جوړ کړي، الله پاک د هغه د پاره په جَنَّت کښې کور جوړوي. ^([1])