والِدِ اعلیٰ حضرت رَحمۃُ اللہِ عَلَیْہ مزید فرماتے ہیں : جو عِبَادت کرتا ہے : *اللہ پاک اس سے محبت فرماتا ہے  *اسے عظمت ملتی *اس کے کام سنورتے *مشکلات میں اس کی مدد کی جاتی *دُشمن کے شَر  سے بچایا جاتا *اس کے دِل سے وحشت دُور کی جاتی ، *اسے بلند ہمتی عطا کی جاتی ہے *اس  کا دل وسیع ہوجاتا ہے ، وہ عِلْم بآسانی سیکھ لیتا ہے * مخلوق کے دِل میں اس کی مَحبَّت ڈالی جاتی ہے *اسے بَرَکت  نصیب ہوتی ہے یہاں تک کہ لوگ اس کے کپڑوں اور مکان سے بھی بَرَکت حاصِل کرتے اور فائدہ اٹھاتے ہیں *عِبَادت گُزار مُسْتَجَابُ الْدَّعْوَات ہو جاتا ہے یعنی اس کی دُعا قبول ہوتی ہے * عِبَادت سے روح کو تازگی اور قوت ملتی ہے ، اَطِبّا (Doctors)کے نزدیک حفظانِ صحّت کے لئے عِبَادت سے بہتر کوئی چیز نہیں ، جو شَخْص ریاضت کرتا ہے اس کادِل خوش اور بدن چُست رہتا ہے * عِبَادت گُزار موت کی سختی سے محفوظ رہے گا * اسے ایمان پر ثابِت قدمی نصیب ہو گی * اسے جوارِ رحمت میں جگہ ملتی ہے * فرشتے اسے قبر کے عذاب سے بچاتے اور نکِیْرَین کے سوالوں کے جوابات سکھاتے ہیں * اس کی قبر روشن اور فراخ کر دی جاتی ہے * قیامت کے دِن اسے تاج پہنایا جائے گا * عِبَادت گزار میدانِ محشر میں بُراق پر سوار ہو کر آئے گا * اس کا  حساب نہ ہو گا ، ہُوا بھی تو آسانی سے لیا جائے گا * اسے حوضِ کوثر سے پانی پینا نصیب ہو گا کہ پھر کبھی پیاس نہ لگے گی * عِبَادت گُزار پل صراط پر آسانی سے گزرے گا * رِضائے اِلٰہی سے مُشَرَّف ہو گا * عِبَادت گزار روزِ قیامت عرشِ الٰہی کے سائے میں جگہ پائے گا *روزِ قیامت اسے دیدارِ الٰہی نصیب ہو گا اور یہ نعمت سب نعمتوں سے افضل ہے۔ ^([1])