Book Name:Maut kay Qasid

میٹھے میٹھے اسلامی  بھائیو! بُوڑھا شخص موت کے بہت زیادہ قریب ہوتا ہے لیکن اس کے باوجود بعض لوگ اس عمر میں بھی گُناہوں کی دَلْدَل میں پھنسے رہتے ہیں اور گالی گلوچ،فلموں ڈراموں ،جُھوٹ، غیبت،  چُغْلی  سے پیچھا نہیں چُھڑ ا پاتے نیز مال کمانے کی دُھن ان پر سوار رہتی ہےجیسا کہ حدیثِ پاک میں آتا ہے کہ حُسنِ اَخلاق کے پیکر،نبیوں کے تاجور صَلَّی اللہُ تَعَالٰی عَلَیْہِ وَاٰلِہٖ وَسَلَّم کا فرمانِ عبرت نشان ہے:''آدمی بُوڑھا ہو جاتاہے مگر اس کی دو(2)چیزیں جوان رہتی ہیں:(۱)حِرص اور(۲)لمبی اُمید۔''(صحیح مسلم،کتاب الزکاۃ،باب کراھیۃ الحرص علی الدنیا،الحدیث۱۰۴۷،ص۵۲۱)

اسی طرح شہنشاہِ خُوش خِصال،پیکرِحُسن وجمالصَلَّی اللہُ تَعَالٰی عَلَیْہِ وَاٰلِہٖ وَسَلَّمکافرمانِ عالیشان ہے:''بُوڑھے کادل دو(2) چيزوں کی مَحَبَّت میں جوان ہی رہتا ہے (۱)زِندگی اور (۲)مال کی مَحَبَّت۔'' (صحیح مسلم،کتاب الزکاۃ،باب کراھیۃ الحرص علی الدنیا،الحدیث۱۰۴۶،ص۵۲۱)   

میٹھے میٹھےاسلامی بھائیو !آپ نے سُناکہ  انسان چاہے بُڑھاپےکی دَہلیز پر  ہی کیوں نہ پہنچ جائے لیکن مال ودولت کی مَحَبَّت اور ہوس اس عمر میں بھی ان کا پیچھا نہیں چھوڑتی اور یوں اُسے  عبادت وریاضت کی چاشنی  نصیب نہیں ہوتی ۔اپنے دل سے دُنیا کی مَحَبَّت مِٹاکر  موت کی یاد دل میں بٹھانے کیلئے مکتبۃُ المدینہ کی مطبوعہ کتاب ’’آنسوؤں کا دریا ‘‘سے 3 نصیحت آموز عربی اشعار کا ترجمہ سُنئے  اور توبہ کے بعد اپنی بقیہ زِندگی اللہ عَزَّ  وَجَلَّ  کی عبادت میں گُزارنے کی نِیَّت کرلیجئے۔

 (۱)اے بُوڑھے شخص! کیابُڑھاپا آنے کے باوُجُود بھی تُو جہالت میں مبُتلاہے ؟ اب (اس عمر) میں تمہاری طرف سے جہالت کامُظاہَرہ اچھانہیں۔

    (۲)تیرافیصلہ توسر کی سفیدی نے کردیامگرپھربھی تُودُنیاکی طرف مائل ہوتاہے اور ناپائیدار (دُنیا) تجھے دھوکہ دے رہی ہے۔