رُوحِ حَق کا میں سراپا کیا لکھوں؟

حُلیۂ نُورِ خُدا  میں  کیا لکھوں؟

پَر جَمالِ رَحْمَۃٌ لِّلْعٰلَمِیْں

جلوہ گر ہوگا مکانِ قَبْر میں

اس لئے ہے آگیا مجھ کو خَیال

مُختصر لکھ دوں جَمالِ بے مثال

تاکہ یاروں کو مِرے پہچان ہو

اور اس کی یاد بھی آسان ہو

تھا مِیانہ قَد و اَوسَط پاک تَن

پر سپید و سُرخ تھا رنگِ بدن

چاند کے ٹکڑے تھے اعضا آپ کے

تھے حَسِین و گول سانچے میں ڈھلے

تھی جبیں رَوشن کُشادہ آپ کی

چاند میں ہے داغ، وہ بے داغ تھی

دونوں اَبرو تھیں مثالِ دو ہِلال

اور دونوں کو ہوا تھا اِتّصال

اِتّصالِ دو مَہِ ”عِیدَین“ تھا

یا کہ اَدنیٰ قُرب تھا ”قَوسَیْن“ کا

تھیں بڑی آنکھیں حَسِین و سُرمگیں

دیکھ کر قُربان تھیں سب حُورِ عِیں

کان دونوں خُوب صُورت اَرجمند

ساتھ خُوبی کے دَہَن بینی بُلند

صاف آئینہ تھا چہرہ آپ کا

صُورت  اپنی اُس میں ہر اِک دیکھتا

تابہ سِینہ رِیشِ مَحبُوبِِ الٰہ

خُوب تھی گُنجان مُو رنگ سیاہ

میں کہوں پہچان عُمدہ آپ کی

دونوں عالَم میں نہیں ایسا کوئی