غزوہً بدر میں خطبہً رسول
غزوہً بدر میں خطبہً رسول
وَ لَقَدْ نَصَرَكُمُ اللّٰهُ بِبَدْرٍ وَّ اَنْتُمْ اَذِلَّةٌۚ-فَاتَّقُوا اللّٰهَ لَعَلَّكُمْ تَشْكُرُوْنَ
اور بے شک اللہ نے بدر میں تمہاری مدد کی جب تم بالکل بے سرو سامان تھے تو اللہ سے ڈرو کہ کہیں تم شکر گزار ہو (آل عمران:۱۲۳)
عزوہ بد راسلامی تاریخ کا وہ پہلا معرکہ ہے جب حق اور باطل، اسلام اور دشمنان اسلام، مسلمان اور کافر پہلی بار صف آرا ہوئے، ایک طرف لشکر اسلام بے سروسامانی کے باوجودتعداد کفار کے مقابلے میں عدد قلت کےساتھ میدان کارزار میں اتارا ۔ جبکہ دوسری طرف سے جنگی سازوسامان اور اسلحہ سے لیس کروفر، رعونت وغور، تکبر وبڑائی، تعدا د لشکر پر بھروسہ کرتے ہوئے صف کفار سے کمزو ر ونحیف مسلمانوں کو للکارا جارہاتھا۔پورا جزیرہ ٔ عرب اسلام کی مخالفت میں یک جان ہوکر اسلام کے نقوش مٹانے کےلئے آمادۂ جنگ تھا۔چنانچہ اس جنگ میں تین گنا بڑی فوج کا سامنا ایسے حق کے علمبرداروں سے ہوا جو بظاہر بہت کمزور تھے مگر اس کمزوری اور سامان جنگ کی عدم دستیابی کےباوجود انہیں اپنے رب کی غیبی امداد پر کامل بھروسہ تھا۔آغازجنگ سے اختتام جنگ تک قریش مکہ کو اس معرکہ حق وباطل میں ایسی ہزیمت کا سامنا کرنا پڑا جس نے ان کے حوصلوں کو پست کردیا انہیں پھر کبھی ہمت نہیں ہوئی کہ وہ مسلمانوں کو للکار سکیں، حالانکہ میدان جنگ کا پیش منظر دیکھ کر اسلام کے فتحیاب ہونے کی امید یں بہت کم تھی مگر تائید نصرت الٰہی سے حق کا پرچم بلند ہو اور کفرکا غورسرنگوں ہوا۔ طلوع اسلام کےبعد خاکدان گیتی پر لڑی جانے والی اس پہلی جنگ کو تاریخ نگاروں نے غزوہ بدر معرکہ بد ر، بدر کبری جیسے ناموں سے موسوم کیا ہے اور خالق ارض وسما نے اس دن کو اپنی لاریب کتاب میں یوم فرقان (فیصلہ کا دن)کے نام سے ذکر کیا ۔یعنی وہ جب جب حق اور باطل کےدرمیان فرق واضح ہوگیا۔اسلام کی بطور دین جزیرہ عرب پر دہشت قائم ہوگئی باطل کو اپنےکروفرکےساتھ منھ کی کھانی پڑی ، حق سے بے بہر باطل پرستوں کو اپنے ہاتھوں کے تراشیدہ خداؤں کی ناتوانی کا یقین ہوگیا اور سرفروشان اسلام کو خدائے واحد کی غیبی امداد کے اترنے پر کامل یقین ہوگیا ۔اللہ تعالی نے قرآن پاک میں ارشاد فرمایا:
ارشاد باری تعالی ہے:
وَ مَاۤ اَنْزَلْنَا عَلٰى عَبْدِنَا یَوْمَ الْفُرْقَانِ یَوْمَ الْتَقَى الْجَمْعٰنِ (الانفال:۴۱)
اور اس پر جو ہم نے اپنے بندے پر فیصلہ کے دن اتارا جس دن دونوں فوجیں ملی تھیں۔
کفار مکہ کی ریشہ دانیوں اور بے جا ظلم وستم سے تنگ آکر جب مسلمانوں نے بحکم الہی مدینہ کی طرفہ ہجرت کی اور وہاں باقاعدہ ایک ریاست مدینہ کا قیام عمل پزیر ہوا تو مسلمانوں کو احکام الہی بجا لانے کےلئے پرسکون ماحول میسر ہو ا لیکن کفار مکہ مدینہ میں بھی اہل ایمان کو ستانے کےلئے مختلف حیلہ بہانے کرتے رہے اور خود نہیں تو دوسرے عرب کے قبیلوں کو اہل اسلام کے خلاف بھڑکاتے تھے چنانچہ ہجرت کے دوسرے سال رسول اللہ صلی اللہ تعالی علیہ وسلم نے صحابہ کے لشکر مدینہ کے اطراف میں کفار مکہ کے پھیلائی ہوئی سازشوں کا قلع قمع کرنے کےلئے بھیجنا شروع کردیا اور کبھی آپ خود بھی بنفس نفیس شرکت کرتے۔ہجرت کے دوسرے سال جہاں مسلمانوں کو باقاعدہ عبادت کے سانچے میں ڈھالنے کےلئے احکامات الہیہ نازل ہونے شروع ہوئے وہیں کفر سے نبرد آزما ہونے کےلئے غزوات اور سرایا کا بھی آغاز ہوتا ہے۔
غزوات یا غزوہ کی جمع ہے اور غزوہ اس لشکر کو کہتے ہیں جس میں رسول اللہ صلی اللہ تعالی علیہ وسلم نے خود بھی شرکت کی ہو اور سرایا سریہ کا جمع ہے اورسریہ اس لشکر کو کہتے ہیں جسے حضور نے دشمن کے مقابلے میں صحابہ کو بھیجا ہو اور اس میں خود شرکت نافرمائی ہو۔ (سیرت رسول عربی، ص ۱۲۲)
غزوہ بد ر کے اسباب میں دو اہم واقعات رونماں ہوئے عزوہ ذو العشیرہ کے بعد رجب میں جب رسول اللہ صلَّی اللہ تعالیٰ علیہ وآلہ وسلَّم
نے عبد اللہ بن جحش کی قیات میں آٹھہ یا بارہ افرا د کی تعداد میں ایک لشکر ترتیب دے کر نخلہ کے مقام پر طائف سے آنے والے سامان تجارت سے لیس قافلہ قریش کی ناقہ بندی کےلئے روانہ کیا۔قافلہ قریش میں میں عَمرْ و بن حَضْرَمی، عثمان بن عبداللّٰہ بن مُغِیرَہ اور اس کا بھائی نَوفَل بن عبداللّٰہ اور ابوجہل کے باپ ہِشام بن مُغِیرَہ کا آزاد کردہ غلام حَکَم بن کَیْسَان تھے۔اس مقام پر لشکر صحابہ کا قافلہ قریش سے مقابلہ ہو ا جس میں عَمرْ وبن حَضْرَمی واصل جہنم ہوااور عثمان بن عبداللّٰہ اور حَکَم بن کَیْسَان گرفتار ہوئے اور باقی بھاگ گئے۔
(سیرت رسول عربی، ص ۱۲۲ مختصرا)
سیرت رسول عربی میں حضرت علامہ نور بخش توکلی فرماتے ہیں کہ:’’ غزوۂ بَدْر ‘‘ سب سے بڑا غزوہ ہے۔ا س کا سبب عَمرْ وبن حَضْرَمی کا قتل اور قافلہ قریش کا شام کی طرف سے آنا تھا۔ یہ وہی قافلہ تھا جس کے قصدسے حضور اقدس صلَّی اللّٰہُ تَعَالٰی عَلَیْہِ وَاٰلِہٖ وَسَلَّم ذُوالعُشَیْرَہ تک تشریف لے گئے تھے۔ امیر قافلہ ابو سُفْیان تھا۔ ‘‘ (سیرت رسول عربی، ص ۲4ا)
ہجرت کے 19 ماہ بعد رمضان المبارک کی 12 تاریخ ہفتہ کے دن اللہ کا رسول صلَّی اللہ تعالیٰ علیہ وآلہ وسلَّم اپنے وفاشعار، جان نثار صحابہ کےہمراہ مدینہ طیبہ سے عالم اسلام کی پہلی جنگ کےلئے روانہ ہوا۔ اس قافلہ شوق شہادت میں مسلمانوں کی تعداد تین سوتیرہ تھی سواری کےلئے ایک گھوڑا ، اسی اونٹ اور باقی سرفروشان اسلام جذبہ جہاد سے سرشار پاپیادہ تھے۔حضور صلَّی اللہ تعالیٰ علیہ وآلہ وسلَّمنے سفر کی حکمت عملی کےلئے ایک اونٹ کو تین صحابہ میں تقسیم کردیا یعنی ہر شخص اپنی باری پر اونٹ پر سوار ہوگا اور لشکر اسلام کے کمانڈر چیف صلَّی اللہ تعالیٰ علیہ وآلہ وسلَّمنے اپنی ذات والا کےلئے کوئی اونٹ خاص نہیں کیا بلکہ انسانی مساوات کی عملی تصویر پیش کرتے ہوئے اپنے اونٹ پر سواری کےلئے مزید دو صحابہ کو مختص فرمایا ایک حضرت علی ،دوسرے حضرت ابو لبابہ اور تیسرے حضور صلَّی اللہ تعالیٰ علیہ وآلہ وسلَّمخود ۔شہادت کےمتوالوں کا قافلہ مدینہ سے جانب منزل روانہ ہوا ، ہر اونٹ سوار اپنی باری مکمل ہونے پر دوسرے کو اونٹ پر سوار کرتایوں جب سرور دوعالم صلَّی اللہ تعالیٰ علیہ وآلہ وسلَّمنے اپنے مسافت کاسفر طے کرکے اونٹ سے اترنے لگے تاکہ دوسرا سوارہو تو دونوں صحابہ نے عرض کہ یارسول اللہ !آپ ہماری باری بھی لےلیں اورہماری خوش نصیبی اس سے بڑھ کر اور کیاہوسکتی ہےکہ آپ اونٹ پر سوار ہوں ہمارے ہاتھ میں اونٹ کی نکیل ہو اور سفر کی گردوغبار ہماری آنکھوں کا سرمہ اور چہرہ کاغازہ بن رہی ہو حضور صلَّی اللہ تعالیٰ علیہ وآلہ وسلَّمنے اپنے صحابہ کا جواب سن کر ارشادفرمایا:
ماانتما اقوی منی وما انا اغنی عنکما عن الاجر
اے میرے صحابہ! تم دونوں نہ مجھے زیادہ طاقتور ہو اور نہ یہ بات ہےکہ میں اجر کے لحاظ سے تم دونوں سے مستغنی ہوں۔
حضورعلیہ الصلاۃ والسلام کے اس ارشاد نے یقینا صحابہ کے حوصلوں کا جلا بخشا ہوگا انہیں اپنے لشکر کے چیف کی اس دل جوئی سے ہمت و طاقت نصیب ہوئی ہوگی اور سالاراعظم پیغمبر اسلام صلَّی اللہ تعالیٰ علیہ وآلہ وسلَّمکی حسن مساوات سے قائدین اور سالاران افواج کو بھی مساوات انسانی کا درس ملاہوگا۔
ادھر شام سے ابوسفیان کی قیادت میں آنے والے قافلہ تجارت کو جب حضور صلَّی اللہ تعالیٰ علیہ وآلہ وسلَّمکی آمد کی اطلاع ملی تو ابوسفیان کو خوف لاحق ہوگیاکہ کہیں اللہ کا رسول تجارتی قافلہ پر حملہ نہ کردے اس نے فور ا بنی غفار کے ماہر شترسوار ضمضم غفاری کو مکہ کی طرف روانہ کیاتاکہ وہ اہل مکہ کوحالات سے باخبر کردے ۔
سیرت نگار شیخ الحدیث جناب عبد المصطفی اعظمی صاحب لکھتے ہیں کہ :’’ جب مکہ میں یہ خبر پھیلی کہ مسلمان مسلح ہو کر قریش کا قافلہ لوٹنے کے لئے مدینہ سے چل پڑے ہیں تو مکہ میں ایک جوش پھیل گیا اور ایک دم کفار قریش کی فوج کا دل بادل مسلمانوں پر حملہ کر نے کے لیے تیار ہو گیا۔جب حضور صلَّی اللہ تعالیٰ علیہ وآلہ وسلَّم کو اس کی اطلاع ملی توآپ نے صحابہ کرام رضی اللہ تعالیٰعنہم کو جمع فرماکر صورتِ حال سے آگاہ کیا اور صاف صاف فرما دیاکہ ممکن ہے کہ اس سفر میں کفارقریش کے قافلہ سے ملاقات ہوجائے اور یہ بھی ہو سکتا ہے کہ کفار مکہ کے لشکر سے جنگ کی نوبت آجائے۔‘‘ (سیرت مصطفی ، ص 211،212)
کفار مکہ کو جب ضمضم غفاری کے ذریعے لشکر اسلام کی خبر ملی تو پورے مکہ کے رؤسا وامرا نے مسلمانوں کے خلاف جنگ کرنے کے عاز م کیا اور بڑے ہی طمطراق سے عشوہ طراز کنیزوں کےساتھ میدان بد ر کی طرف روانہ ہوئے ۔جنگی آلات سے لیس ،اونٹوں کی کثرت، گھوڑوں کی بہتات ، ماہر جنگجو، دشمن کے وار سے بچنے کےلئے حفاظتی سامان وغیرہ کےساتھ بدر میں مقام عدوۃ القصوی پراترے ۔
دوسری طرف تین سو تیرہ قدسیوں کالشکر اپنے سالار اعظم نور مجسم صلَّی اللہ تعالیٰ علیہ وآلہ وسلَّم کی قیادت میں مقام بدر میں عدوۃ الدنیا پر قیام خیمہ زن ہوا۔
سورہ انفال کی آیت نمبر 42 میں مسلمانوں اور کفار کے ٹھہرنے کےمقامات کا تذکرہ کچھ یوں کیاگیا:
اِذْ اَنْتُمْ بِالْعُدْوَةِ الدُّنْیَا وَ هُمْ بِالْعُدْوَةِ الْقُصْوٰى وَ الرَّكْبُ اَسْفَلَ مِنْكُمْؕ-
جب تم نالے کے اُس کنارے تھے اور کافر پَرلے کنارے اور قافلہ تم سے ترائی میں (سورۃ الانفال : 42)
بظاہر کفار نے جس جگہ پڑاؤ کیا وہ جنگی اعتبار سے بہت ہموار تھی جبکہ لشکر اسلام نے جس جگہ قیام کیا وہ جنگی اعتبار سے بہت ناہموار اور ریتلی تھی جس پر چلنا بھی بہت دشوار تھا ۔دشمن اسلام تعداد میں تین گنا زیادہ تھے ،سامان جنگ اور کھانے پینے اور علاوہ دیگر وسائل کی موجود گی پر مطمئن ، محاذ جنگ کاتمام محل وقوع ان کے موافق نیز پانی کے سب کنوئیں بھی ان کے کنٹرول میں تھے ،جبکہ اہل اسلام کا لشکر تو صرف قریش کے قافلہ تجارت کی سرکوبی کےلئے مدینہ سے روانہ ہوا تھا،پانی کی قلت کا یہ عالم تھا کہ اپنی تو کجا جانوروں کےلئے بھی پانی دستیاب نہ تھا ان پریشان کن حالات میں وسوسوں کا آنا فطری عمل تھا۔اس یاس کی کیفیت میں نصرت الہی کی نوید بارش کی صورت میں برسی، اللہ کی رحمت کی جلوہ سامانی زور دار بارش کے نزول کے ساتھ ہوئی،اس باران رحمت سے ریتیلی زمیں ہموار فرش بن گئی ،زمیں پر چلنا آسان ہوگیا ، نشیبی جگہوں پر پانی وافرمقدار میں جمع ہوگیا اور ادھر کفار نے جس جگہ پڑاؤ ڈالاتھا اس جگہ رحمت الہی زحمت بن کر برسی ، جگہ جگہ کیچڑ ہوگیا، چلنا دشوار ہوگیا ۔قدرت الہی سے محاذ جنگ کا محل وقوع ہی تبدیل ہوگیا ۔صحابہ کے دلوں میں آنے والے وسوسے کافور ہوگئے ، دل میں سکینہ طاری ہوگیا ،قلبی سکون سے جسمانی اعضاکی تھکن پرسکون نیند سے دور ہوگئی۔میدان بدر میں اترنے والی اس رحمت کی منظر کشی سورہ انفال میں کچھ اس طرح ذکر کی گئی :
اِذْ یُغَشِّیْكُمُ النُّعَاسَ اَمَنَةً مِّنْهُ وَ یُنَزِّلُ عَلَیْكُمْ مِّنَ السَّمَآءِ مَآءً لِّیُطَهِّرَكُمْ بِهٖ وَ یُذْهِبَ عَنْكُمْ رِجْزَ الشَّیْطٰنِ وَ لِیَرْبِطَ عَلٰى قُلُوْبِكُمْ وَ یُثَبِّتَ بِهِ الْاَقْدَامَ (سورۃ الانفال:11)
جب اُس نے تمہیں اُونگھ سے گھیر دیا تو اس کی طرف سے چین(تسکین) تھی اور آسمان سے تم پر پانی اتارا کہ تمہیں اس سے ستھرا کردے اور شیطان کی ناپاکی تم سے دور فرماوے اور تمہارے دلوں کی ڈھارس بندھائے اور اس سے تمہارے قدم جمادے ۔
شیخ الحدیث حضرت علامہ مولانا عبدالمصطفٰی اعظمی رحمۃ اللہ علیہ عَجَائِبُ القرآن مع غَرَائِبِ القرآن میں مذکورہ آیت کے ضمن میں فرماتے ہیں کہ :’’ اس آیت میں اللہ تعالیٰنے بدر میں اس ناگہانی بارش کے چار فائدے بیان فرمائے ہیں:
(۱)تاکہ جو بے وضو اور بے غسل ہوں وہ وضو اور غسل کر کے پاک و صاف اور ستھرے ہو جائیں۔
(۲)مسلمانوں کے دلوں سے شیطانی وسوسہ دور ہوجائے۔
(۳)مسلمانوں کے دلوں کو ڈھارس مل جائے کہ ہم حق پر ہیں اور اللہ تعالیٰضرور ہماری مدد فرمائے گا۔
(۴)محاذ جنگ کی ریتیلی زمین اس قابل ہوجائے کہ اس پر قدم جم سکیں الغرض جنگ بدر کی یہ بارش مسلمانوں کے لئے بارانِ رحمت اور کفار کے لئے سامانِ زحمت بن گئی۔‘‘ ( عجائب القرآن مع غرائب القرآن،ص 298)
دشمن کا للکارتا ہوا لشکر اپنی عددی کثرت پرنازاں بڑے کروفر سے جنگ کی تیاری میں مصروف تھا،کنزیں اپنے رقص وسرور سے ان کی آتش غیض وغضب کو بھڑکارہی تھیں جبکہ دوسری طرح مصطفوی لشکر میں اطمینان و تسکین کا سماں باندھا ہواتھا ، ان کےدل ایمان ویقین کے چراغ سے ٹمٹمارہے تھے،اپنے رب کریم کے نام کوبلند کرنے، اپنے آقا کے دین کا پرچم اونچالہرانے کےلئے شوق شہادت میں سردھڑ کی بازی لگانےکےلئے بے چین تھے،انہیں دشمن کی تعداد کی کثرت اور اسلحہ کی فراوانی کا بلکل خوف نہیں تھا ، پرسکون نیند کی آغوش میں سورہے تھے اور حضور اپنے عریش ( چھپڑے ) میں بارگاہ الہی میں سربسجود فتح وکامرانی کےلئے دعائیں مانگ رہے تھے۔
شیخ الحدیث حضرت علامہ عبد المصطفیٰ اعظمی علیہ رحمۃ اللہ الغنی لکھتے ہیں:’’ حضور سرورِ عالم صلی اﷲ تعالیٰ علیہ وسلم اس نازک گھڑی میں جناب باری سے لو لگائے گریہ و زاری کے ساتھ کھڑے ہو کر ہاتھ پھیلائے یہ دعا مانگ رہے تھے کہ ''خداوندا !تو نے مجھ سے جو وعدہ فرمایا ہے آج اسے پورافرما دے۔''آپ پر اس قدر رقت اور محویت طاری تھی کہ جوشِ گریہ میں چادر مبارک دوش انور سے گر گر پڑتی تھی مگر آپ کو خبر نہیں ہوتی تھی، کبھی آپ سجدہ میں سر رکھ کر اس طرح دعا مانگتے کہ ''الٰہی!اگر یہ چند نفوس ہلاک ہو گئے تو پھر قیامت تک روئے زمین پر تیری عبادت کرنے والے نہ رہیں گے۔
حضرت ابوبکر صدیق رضی اﷲ تعالیٰ عنہ آپ کے یارغار تھے۔ آپ کو اس طرح بے قرار دیکھ کر ان کے دل کا سکون و قرار جاتا رہا اور ان پر رقت طاری ہو گئی اور انہوں نے چادر مبارک کو اٹھا کر آپ کے مقدس کندھے پر ڈال دی اور آپ کا دست مبارک تھام کر بھرائی ہوئی آواز میں بڑے ادب کے ساتھ عرض کیا کہ حضور! اب بس کیجیے خدا ضرور اپنا وعدہ پورا فرمائے گا۔
اپنے یارغار صدیق جاں نثار کی بات مان کر آپ صلی اللہ تعالیٰعلیہ وسلم نے دعا ختم کر دی اور آپ کی زبان مبارک پر اس آیت کا ورد جاری ہو گیا کہسَیُهْزَمُ الْجَمْعُ وَ یُوَلُّوْنَ الدُّبُرَعنقریب (کفارکی) فوج کو شکست دے دی جائیگی اور وہ پیٹھ پھیر کر بھاگ جائیں گے۔‘‘ (سیرت مصطفی:۲۲۴)
غزوہ بدر میں جنگ کا آغاز کفار کی طرف سے عامر بن الحضرمی نے کیا جو اپنے مقتول بھائی عمرو بن الحضرمی کے خون کابدلہ لینے بے چین تھا،صف کفار سے آگے بڑھا اس کے مقابلے میں امیر المؤمنین سیدنا فاروق اعظم کے غلام حضرت مہجع شوق شہادت سے میدان میں نکلے اور لڑتے ہوئے جام شہادت پیا پھرحضرت حارثہ بن سراقہ جو کنواں سے پانی پے رہے تھے اچانک ان کو کفار کا تیر لگا جس سے آپ کو شہادت نصیب ہوئی۔اس موقع پر سالار اعظم ،چیف کمانڈر حضرت محمد صلی اللہ علیہ سلم نے شوق شہادت اور جذبہ جہاد بڑھانے کےلئے خطبہ ارشاد فرمایا کہ:’’ اس جنت کی طرف بڑھو جس کی چوڑائی آسمان وزمین کے برابر ہے‘‘۔ حضرت عمیر بن الحمام اس وقت کھجوریں کھارہے تھے،آپ نے حضور صلَّی اللہ تعالیٰ علیہ وآلہ وسلَّمکے خطبہ میں جنت کی بشارت سنی تو خوشی سے کھڑے ہوئے اور کھجوریں پھینک کر لشکر کفار پر حملہ آور ہوئے اور بڑی جانبازی سے لڑ کر شہادت کو گلے لگایا اور حضور صلَّی اللہ تعالیٰ علیہ وآلہ وسلَّمکی بشارت کےمستحق ہوئے۔ (سیرت مصطفی:۲۲۴)
اعدائے اسلام کی طرف سے جنگ کی پہلی چنگاری اسود بن عبد الاسد المخزومی نے بھڑکائی اس بدبخت شخص نے اعلان کیا تھاکہ میں نے اللہ سے وعدہ کیا ہےکہ مسلمان کےحوض سے پانی پئے گا اور اسے منہدم کردے گا۔جب وہ اپنی امید کو پورا کرنےکےلئے پانی کے تالاب کی طرف لپکا تو حضور کے چچاجان امیر حمزہ رضی اللہ عنہ اس پر جھپٹے اور اپنی تیز دھار تلوار سے اس کی پنڈلی کاٹ دی جس سے خون کافوارہ بہنے لگا اس بدطینت نے چاہا کہ مسلمان کا حوض خون آلود ہوجائے چنانچہ اپنی زخمی پنڈلی کو گھسیٹا ہوا پانی کےطرف بڑھا تاکہ اس کے ناپاک خون سے پانی ناقابل استعمال ہوجائے ۔حضرت حمزہ رضی اللہ عنہ نے اس پر دوسرا وار کیا جس نے اس کا کام تمام کردیا اس معرکہ حق وباطل میں یہ پہلا کافر تھا جو واصل جہنم ہوا۔یوں باقاعدہ جنگ کے سلسلہ کا آغاز ہوا جس میں کفارمکہ کو شکست فاش ہوئی اور مسلمانوں کو فتح ونصرت ملی ۔
کفار مکہ کو یقینا تھاکہ مسلمان ان کے پہلے حملہ کی تاب نہ لاسکیں گے، وہ مسلمانوں پر طوفان بن کر برسیں گے اور خس وخاشاک کی طرح اڑالے جائیں گے ان کے خیال فاسد میں مسلمانوں کی ظاہری حالت تھی لیکن انہیں اس بات کا علم نہ تھاکہ یہ فاقہ مست اللہ کے رسول کے متوالے شوق شہادت کو سینے سے لگائے جنت کے طالبگار بن کر میدان جہاد میں اترے تھے ، انہیں مو ت کا ڈر نہیں تھا اور نہ اس بات اندیشہ تھا کہ ان کےبعد ان کے گھر والوں کا کون والی وارث ہوگا وہ تو سب رشتوں کو پیچھے چھوڑ آئے تھے ان کی منزل جنت کی ابدی نعمتیں تھیں اسیلئے وہ اللہ کی نصرت پر کامل یقین رکھتے ہوئے کفار سے برسرپیکار ہوئے تھے ۔پھر حضور کی چشم مازاغ نصرت الہی کی متنظر تھیں اور حضور نبی رحمت دو عالم کو اللہ کی غیبی امداد اترنے کا بھی کامل یقین تھا۔اسیلئے کریم پروردگار نے اپنے نبی کی میدان بد ر میں مانگی ہوئی دعاؤں کی اجابت کا ذکر سورہ انفال کی آیت نمبر 9 میں کیا: ’’ اِذْ تَسْتَغِیْثُوْنَ رَبَّكُمْ فَاسْتَجَابَ لَكُمْ اَنِّیْ مُمِدُّكُمْ بِاَلْفٍ مِّنَ الْمَلٰٓىٕكَةِ مُرْدِفِیْنَ(۹)وَ مَا جَعَلَهُ اللّٰهُ اِلَّا بُشْرٰى وَ لِتَطْمَىٕنَّ بِهٖ قُلُوْبُكُمْۚ-وَ مَا النَّصْرُ اِلَّا مِنْ عِنْدِ اللّٰهِؕ-اِنَّ اللّٰهَ عَزِیْزٌ حَكِیْم
(سورۃ الانفال: ۹،۱۰)
ترجمۂ کنزُالعِرفان: یاد کرو جب تم اپنے رب سے فریا د کرتے تھے تو اس نے تمہاری فریاد قبول کی کہ میں ایک ہزار لگاتار آنے والے فرشتوں کے ساتھ تمہاری مدد کرنے والا ہوں۔ اور اللہ نے اس کوخوشخبری کیلئے ہی بنایا اور اس لیے کہ تمہارے دل مطمئن ہوجائیں اور مدد صرف اللہ ہی کی طرف سے ہوتی ہے۔بیشک اللہ غالب حکمت والا ہے۔‘‘
رسول اللہ صلَّی اللہ تعالیٰ علیہ وآلہ وسلَّم کی گریہ وزاری، نیازمندانہ التجاؤں نے مالک کائنات کو اپنے حبیب لبیب صلَّی اللہ تعالیٰ علیہ وآلہ وسلَّم کی دستگیری اور سراپا پیکر عشق رسول صحابہ کرام کی مدد اور تائید کی طرف مائل بہ کرم کیا،آسمان قدسیوں کو حکم آیا جاؤ جاؤ بلندیوں سےنیچے اتر کر محفل ذکر وفکر کوچھوڑ کر بدر کی وادی کا رخ کرو جہاں میرا محبوب اپنے غلاموں کے ساتھ میرے نام کو بلند کرنےکےلئے کفر کی طاغوتی قوتوں کے سامنے سینہ سپر ہے۔ آسمان سے ملائکہ کے نزول کی کیفیت کے چشم دید گواہ حضرت سہل بن حُنَیف رَضِیَ اللہ تَعَالٰی عَنْہُ فرماتے ہیں کہ’’غزوۂ بدر کے دن ہم میں سے کوئی تلوار سے مشرک کی طرف اشارہ کرتا تھا تو اس کی تلوار پہنچنے سے پہلے ہی مشرک کا سر جسم سے جدا ہو کر گر جاتا تھا۔ (معرفۃ الصحابہ، سہل بن حنیف بن واہب بن العکیم، ۲ / ۴۴۱، رقم: ۳۲۹۹،تفسیر صراط الجنان، جلد ۳،ص ۵۳۰)
غزوہ ٔ بدر کو یوم فرقان اس لئے کہتے ہیں کہ حق اپنے مخالف کی تمام تر سازشوں کےباوجود فتح وکامرانی کےساتھ ظاہر ہواور باطل اپنے تمام تر مذموم مقاصد اور کروفر کےساتھ شکست خوردہ ہوا ۔اسلام اور کفر کےدرمیان خطہ امتیاز کھینچ دیا گیا۔ 17 رمضان کادن کفار کے بڑے بڑے پیشواؤں، سورماؤں، امراؤں کی عبرت ناک موت کا دن قرار دیا گیا۔ سرداران قریش جو بڑے ہی طمطراق کےساتھ صحابہ کی جماعت کو ختم کرنے آئے تھے وہ خود واصل جہنم ہوئے۔
عتبہ، شیبہ، ابو جہل وغیرہ کفار قریش کے سرداروں کی ہلاکت سے کفار مکہ کی کمر ٹوٹ گئی اور ان کے پاؤں اکھڑ گئے اور وہ ہتھیار ڈال کر بھاگ کھڑے ہوئے۔اس جنگ میں کفار کے ستر آدمی قتل اور ستر آدمی گرفتار ہوئے۔ باقی اپنا سامان چھوڑ کر فرار ہو گئے اس جنگ میں کفارِ مکہ کو ایسی زبردست شکست ہوئی کہ ان کی عسکری طاقت ہی فنا ہو گئی۔ کفار قریش کے بڑے بڑے نامور سردار جو بہادری اور فن سپہ گری میں یکتائے روزگار تھے ایک ایک کرکے سب موت کے گھاٹ اتار دئیے گئے۔ ان ناموروں میں عتبہ، شیبہ،ابو جہل، ابو البختری، زمعہ،عاص بن ہشام، اُمیہ بن خلف، منبہ بن الحجاج، عقبہ بن ابی معیط، نضر بن الحارث وغیرہ قریش کے سرتاج تھے یہ سب مارے گئے۔
( المواھب اللدنیۃمع شرح الزرقانی، غزوۃ بدرالکبریٰ، ج۲،ص۳۲۸ملخصاًوالسیرۃ،سیر ت مصطفی، ۲۳۲،۲۳۳)
غزوہ بدر میں ملنی والی فتح مبین کے اثرات سےاسلام اور دعوت محمدیہ علی صاحبھا الصلاۃ و السلام کی حقیقت جزیرہ عرب پر آشکارا ہوگئی۔عرب باشندوں کی اکثریت انسانی ہاتھوں کے تراشیدہ بتوں کی خدائی پر صمیم قلب سے یقین رکھتی تھی،انہیں اپنے جھوٹے خداؤں کی امداد پر غیر متزلزل یقین تھا وہ بزعم باطل اپنے عقائدہ فاسدہ کےساتھ ایسے چمٹے ہوئےتھے کہ سچائی وصداقت کو کسی بھی صورت میں ماننے کےلئے تیار ہی ہوتے نہیں تھے یہ ہی وجہ ہےکہ زبانی تبلیغ سے ان کے دلوں کی دنیا پر اسلام کا رعب اور پیغمبر اسلام کی سچائی کا کوئی اثر نہیں ہواتھا، انہیں اس بات کا یقین تھا کہ وہ ہر لحاظ سے غالب ہیں اور ان کےاس دعوے کے پیچھے ان کے تصورارتی خداؤں کی جھوٹی خدائی تھی۔جب قریش مکہ سے بدر میں مسلمانوں سے لڑنےکےلئے نکلے تو ان کو یقین تھا کہ اس سفر میں ان کی مد د کےلئے صنم کدہ کےبت آئیں گے لیکن جب مصطفی کریم کے درویشوں نے ان کے ستر سرداروں کو تہ تیغ کردیا، ستررئیس پابندسلاسل ہوگئے مگر شکست وہزیمت سے دوچار کفار کی مدد کےلئے کوئی بت نا آسکا ۔یوں کفار مکہ پر حضور کی دعوت کی سچائی آشکار ہوئی ، ان کے دلوں میں اپنے خداؤں کےبارے میں وسوسے پیداہوناشروع ہوگئے ،انہیں ایک خدائے واحد کی طاقت کا اندازہ ہوگیا کہ جس نے غریب الوطن کمزوں کو اتناطاقت دی کہ انہوں نے اپنی تعداد سے تین گنا بڑی فوج کو شکست سے دوچار کردیا یقینا یہ سب کچھ خدا وحدہ لاشریک لہ کی مدد کےبغیر ممکن نا تھا۔
دوسرا نتیجہ یہ نکلا کہ کفار صحابہ کو کمزور ،ناتواں ،بے آسرا سمجھتے تھے ان کے گمان میں تھاکہ وہ کبھی طاقتور قریش مکہ سے ٹکڑا نہیں سکتے تھے لیکن جب انہوں نے دیکھ لیا کہ یہ مٹی کے ٹیلے نہیں چٹانیں بن گئے ہیں آہنی دیوار ہیں ،ان کو شکست دینا آسان نہیں ۔چنانچہ غزوہ بد ر کا دوسرا بڑا اثر کفار پر رعب کو صورت میں ہوا ان کےدلوں میں مسلمانوں کا رعب جم گیا، دھاک بیٹھ گئی،وہ مسلمانوں کو کمزور نہیں ایک طاقت ور قوم سمجھنے لگ گئے۔
غزوہ بدر میں اہل اسلام کی کامیابی سے مدینہ میں موجود یہودیت کو بہت بڑا جھٹکا لگا ، اس فتح مبین سے یہودیوں کی قومی عصبیت بیدار ہوگئی۔مدینہ میں منافقوں کا چہر ہ طشت از بام ہوگیا۔انہوں نے اوس وخزرج قبلے میں کفار کی باقیات کے ساتھ مل کر مسلمانو ں کے خلاف خفیہ سازشیں کرنا شروع کردیں،اسلام کی فتح سے یہود کےدلوں میں حسد کی آگ اور بھڑک اٹھی۔
الغرض بدر کےمقام پر حق وباطل کے درمیان ہونے والے معرکہ میں اسلام ایک قوت کے طور پر جزیرہ عرب پر ظاہر ہوا،صحابہ کرام کے حوصلے بلندہوئے، عسکری میدان میں افواج صحابہ برق خاطف کی طرح چمکےاور اس جنگ کے بعد اسلامی فتوحات کا باقاعدہ سلسلہ شروع ہوا ۔
حضور نبی رحمت صلَّی اللہ تعالیٰ علیہ وآلہ وسلَّم نے بدر میں شریک ہونے والے اپنے مخلص بدری صحابہ کےبارے میں ارشاد فرمایا:’’ بے شک اﷲ تعالیٰ اہل بدر سے واقف ہے اور اس نے یہ فرمادیا ہے کہ تم اب جو عمل چاہو کرو بلاشبہ تمہارے لیے جنت واجب ہو چکی ہے یا(یہ فرمایا) کہ میں نے تمہیں بخش دیا ہے۔'' (صحیح البخاری ،کتاب المغازی ، ،الحدیث:۳۹۸۳، ج۳،ص،۱۲،سیرت مصطفی ،ص ۲۴۵)
17 رمضان المبارک اسلامی تاریخ کا ایک اہم دن ہے جس میں معرکہ حق وباطل رونما ہوا۔اس ایونٹ اور تاریخی واقعہ کےبارے میں مزید معلومات کےلئے دعوت اسلامی کے مکتبۃ المدینہ کی شائع کردہ دوکتابیں شائقین مطالعہ کو دعوت مطالعہ دیتی ہیں۔ ایک کتاب سیریت مصطفی جو کہ عبد المصطفی اعظمی صاحب نے لکھی ہے اور دوسری کتاب سیرت رسول عربی جوحضرت علامہ نور بخش توکلی صاحب نے لکھی ہے ۔یہ دونوں کتابیں دعوت اسلامی کی آفیشنل ویب سائٹ پر بھی دستیاب ہیں۔اسلام کے اس محیر العقول واقعات اور داستان سرفروشان اسلام پڑھنے کےلئے بہت کچھ علمی مواد المدینہ آن لائن لائبریری میں بھی موجود ہے۔سترہ رمضان المبارک میں ہونے والے امیر اہلسنت کے مدنی مذاکرے میں بھی عشق ومحبت سے لبریز ملفوظات غزوہ بدر سے متعلق موجود ہیں۔
آیئے اشاعت اسلام کی عظیم تحریک دعوت اسلامی کے علمی پلیٹ فارم سے تعلیم اسلام، مطالعہ اسلام اور تاریخ اسلام کے علمی ذخائر کو ویب سائٹ کےذریعے ذہن نشیں کرتے ہیں اور دوسروں کو بھی صحابہ کرام کی سیرت کے مطالعہ کےلئے دعوت دیتے ہیں۔
ہر رمضان المبارک پرسوزلمحات میں اصحاب بدر کی بارگاہ میں نذرانہ عقیدت ومحبت پیش کرنے کےلئے عالمی مدنی مرکز فیضان مدینہ میں مدنی مذاکرہ کا اہتمام کیا جاتاہے یہ وہ علمی مجلس اور نشست ہوتی ہے جس میں شیخ الطریقت امیر اہلسنت حضرت علامہ مولانا محمد الیاس قادری صاحب مختلف علمی سوالات کے جوابات دینے کاساتھ فضائل اہل بدر بھی بیان کرتے ہیں اور آخر میں اصحاب بدر کےتوسل سے رقت انگیز دعائیں بھی مانگی جاتی ہیں۔
