اُسی شب یا اسی مہینے میں مرگیا اُسے 30شہیدوں کا ثواب عطا فرماؤں گا۔^([1])

پڑھتے رہو نماز کہ جنّت میں جاؤ گے        ہوگا وہ تم پہ فضل کہ دیکھے ہی جاؤ گے

پیارے اسلامی بھائیو! پتا چلا؛ 5نمازوں کے الگ الگ وقت مُقَرَّر کرنے کی الگ الگ فضیلتیں اور الگ الگ حکمتیں ہیں، لہٰذا ہمیں چاہیے کہ ان فضیلتوں کو حاصِل کریں، ہر نماز اس کے وقت مقرّر ہی میں ادا کیا کریں، خواہ کیسی ہی مَجْبُوری ہو، ہر مَجْبُوری کو ایک طرف رکھ کر پہلے نماز پڑھیں، پِھر دوسرے کاموں میں لگ جایا کریں۔ اللہ پاک ہمیں اس کی توفیق نصیب فرمائے۔ اٰمِیْن بِجَاہِ خَاتَمِ النَّبِیّٖن صَلَّی اللہ عَلَیْہِ وَ آلِہٖ وَسَلَّم۔

نماز وقت گزار کر پڑھنے کا وبال

یاد رکھیے! نماز کو اس کے وقت سے ہٹانا یعنی قضا کرنا انتہائی سخت گُنَاہ ہے۔ اللہ پاک قرآنِ کریم میں فرماتا ہے:

فَخَلَفَ مِنْۢ بَعْدِهِمْ خَلْفٌ اَضَاعُوا الصَّلٰوةَ (پارہ:16، سورۂ مریم:59)

تَرْجمۂ کَنْزُالعِرْفان: تو ان کے بعد وہ نالائق لوگ ان کی جگہ آئے جنہوں نےنمازوں کو ضائع کیا۔

صحابئ رسول حضرت عبد اللہ بن مسعود رَضِیَ اللہ عنہ اس آیت کی تفسیر میں فرماتے ہیں: اس کا یہ معنیٰ نہیں ہے کہ وہ لوگ سِرے سے نماز پڑھتے ہی نہیں تھے بلکہ معنیٰ یہ ہے کہ وہ لوگ نماز کا وقت گزار کر پڑھتے تھے۔^([2])