آپ بھی نِیّت فرمائیے! آج ہی سے اِنْ شَآءَ اللہ الْکَرِیْم!اِس نیک عمل پر مضبوطی سے عمل پیرا ہوں گے اور روزانہ رات کو سورۂ مُلْک  پڑھ یا سُن لیا کریں گے۔

سور ۂ مُلْک  کے مضامین کا خُلاصہ

پیارے اسلامی بھائیو! سورۂ مُلْک  ویسے تو ایک مختصر سُورت ہے، البتہ!اِس کے مضامین بہت گہرے، اِس کے اندر معلومات بہت اعلیٰ موجود ہیں، اِس مبارَک سُورت میں اللہ پاک کی قدرتوں کو بیان کیا گیا، آیت: 3 اور 4 میں فرمایا: وہی خُدا ہے، جس نے  ایک دوسرے کے اُوپَر 7 آسمان بنائے، کیا تمہیں رَبِّ رحمٰن کی تخلیق میں کوئی کمی نظر آتی ہے؟ اُٹھاؤ نگاہیں...!! دیکھو آسمان...!! اتنا بڑا، وسیع و عریض آسمان جو ساری زمین کو گھیرے ہوئے ہے، بغیر ستونوں کے کھڑی ہوئی اتنی بڑی چھت...!! کیا تمہیں اِس میں کہیں تھوڑا سا بھی کوئی رخنہ، کوئی سوراخ نظر آتا ہے؟ پِھر نظر اُٹھاؤ! پِھر دیکھو...!! بار بار دیکھو...!! خوب غور سے دیکھو...!! ہزار بار بھی دیکھو گے تو تمہاری نظر نامراد لوٹ آئے گی، آسمان میں کہیں کوئی چھوٹا سا بھی سُوراخ نظر نہیں آئے گا۔ سُبْحٰنَ اللہ! کیسی زبردست تخلیق ہے...!!

آیت: 19 میں فرمایا: اپنے اُوپَر اڑتے ہوئے پرندوں کو دیکھو...!! یہ کیسے پَر پھیلاتے ہوا میں مُعَلَّق رہتے ہیں، گِرتے نہیں ہیں، اِنہیں زمین و آسمان کے درمیان میں کس نے روک رکھا ہے...؟ یقیناً وہ رَبِّ رحمٰن و رحیم ہی ہے۔

آیت: 23-24 میں فرمایا: وہ رَبِّ رحمٰن و رحیم ہے جس نے تمہیں پیدا کیا، تمہارے لیےکان، آنکھیں اور دِل بنائے،  وہی اللہ پاک ہے، جس نے تمہیں زمین میں پھیلا دیا، پِھر اسی کی طرف تم اُٹھائے جاؤ گے۔