اهڙو صبر ڪري وٺون، نفس سستي ڏياري ته هڪ ڀيرو بس جيءُ ماري عبادت ۾ لڳي وڃون، ڪجهه عرصو مشڪل ٿيندي، پوءِ آهستي آهستي نفس عادي ٿي ويندو. پوءِ اِنْ شَآءَ اللہُ الْکَرِیْم! مشڪل نه ٿيندي.

صحابيءِ رسول جي بي مثال استقامت

   حضرت جابر رَضِیَ اللہُ عنہ فرمائن ٿا: هڪ ڀيري اسان الله پاڪ جي پياري نبي، رسولِ هاشمي صَلَّی اللہُ عَلَیْہِ وَ آلِہٖ وَ سَلَّم سان گڏ ڪنهن غزوه ۾ وياسين، واپسي تي اسان هڪ پهاڙي علائقي ۾ پهتاسين، رسول اڪرم، نورِ مجسم صَلَّی اللہُ عَلَیْہِ وَ آلِہٖ وَ سَلَّم اتي ئي قيام جو حڪم فرمايو. تمام صحابهءِ ڪرام عَلَیْہمُ الرِّضْوَان آرام جي خاطر اتي ترسي پيا. الله پاڪ جي حبيب، دلين جي طبيب صَلَّی اللہُ عَلَیْہِ وَ آلِہٖ وَ سَلَّم فرمايو: اڄ رات ڪير پهرو ڏيندو؟ هڪ مهاجر ۽ هڪ انصاري صحابي رَضِیَ اللہُ عنہما اٿيا ۽ عرض ڪيائون: يارسولَ الله صَلَّی اللہُ عَلَیْہِ وَ آلِہٖ وَ سَلَّم! اها سعادت اسان حاصل ڪرڻ چاهيون ٿا، اسان کي قبول فرمايو! رسول اڪرم، نورِ مجسم صَلَّی اللہُ عَلَیْہِ وَ آلِہٖ وَ سَلَّم اجازت عطا فرمائي، تنهنڪري اهي ٻئي صحابي رَضِیَ اللہُ عنہما پهرو ڏيڻ لاءِ تيار ٿي ويا، انهن ٻنهي پاڻ ۾ مشورو ڪيو ۽ اهو طئي ٿيو ته اڌ رات تائين هڪ پهرو ڏئي، ٻيو آرام ڪري، پوءِ پهريون آرام ڪري ۽ ٻيو پهرو ڏئي. پوءِ پهرين اڌ رات مهاجر صحابي رَضِیَ اللہُ عنہ آرام ڪيو ۽ انصاري صحابي رَضِیَ اللہُ عنہ پهرو ڏيڻ لڳا. ڪجهه دير گذري ته ان انصاري صحابي رَضِیَ اللہُ عنہ نماز شروع ڪري ڏني ۽ سوره ڪهف جي تلاوت ڪرڻ لڳا. ان دوران اوچتو دشمن جي هڪ شخص پهاڙي تي چڙهي تير وسائڻ شروع ڪري ڏنا.