سچّے طلب گار بن جائیں...!! حضرت علی المرتضیٰ  رَضِیَ اللہ عنہ  ہم جن کی غُلامی کا دم بھرتے ہیں، ان کی تو شان یہ تھی کہ اللہ پاک کو راضی کرنے کے لیے جان تک کی بازی لگانے کو تیار ہو گئے، دوسری طرف ہمارا حال یہ ہے کہ *اللہ پاک کو راضی کرنے کے لیے صِرْف و صِرْف نماز کا وقت بھی نہیں نکال پاتے *دُنیا بھر کی مصروفیت اپنے کندھوں پر ڈال رکھی ہے، اللہ پاک کے حُضُور سجدہ کرنے کا وقت ہمیں نہیں ملتا *فضولیات میں پڑے رہتے ہیں، گپیں بہت مار لیتے ہیں، فضول بلکہ گُنَاہوں بھری باتیں بہت کر لیتے ہیں مگر افسوس! اللہ پاک کا ذِکْر کر کے اس کی رضا پانے کا وقت ہمیں نہیں ملتا *دُنیا بھر کی خبریں سُنتے رہیں گے *فیس بک وغیرہ کی پوسٹیں روزانہ سینکڑوں دیکھ لیں گے *انسٹا گرام ، واٹس ایپ وغیرہ کے درجنوں میسج پڑھ،سُن لیں گے مگر افسوس! قرآنِ کریم کی تِلاوت کر کے اللہ پاک کو راضِی کرنے کے لیے ہم تیار نہیں ہو پاتے...!! آہ! افسوس! نفسِ اَمّارہ نے ہمیں دھوکے میں ڈال رکھا ہے، بس دِن رات کھانے، کمانے، مشہور ہونے، نام اور شہرت کمانے، زیادہ سے زیادہ مال کمانے کی دُھن میں مگن زندگی گزارتے چلے جا رہے ہیں، اگر ہم کچھ نہیں کر پاتے، وقت نہیں نکال پاتے تو ان کاموں کے لیے نہیں نکال پاتے جن کاموں سے اللہ پاک کی رضا نصیب ہوتی ہے۔ کاش! ہمارے حال پر کرم ہو جائے، کاش! فیضانِ مولیٰ علی  رَضِیَ اللہ عنہ  نصیب ہو جائے اور ہم اللہ پاک کی رِضا کے طلب گار بن جائیں۔

اِیْمان کامِل کب ہوتا ہے...؟

پیارے اسلامی بھائیو! یہ بات ذِہن میں بٹھا لیجیے! ہم مسلمان ہیں اور مسلمان کی زندگی کا مقصد دُنیا کی رنگینیوں میں کھو جانا نہیں بلکہ مسلمان کی زندگی کا مقصد ساری زندگی