د بيان اوريدلو  نيتونه

پۀ حديثِ پاک کښې دي: اِنَّمَا الْاَعْمَالُ بِالنِّیَّات د اعمالو دار و مدار پۀ نيتونو دے۔ ^([1])

اے د خوږ نبي صَلَّى اللهُ عَلَيْهِ وَاٰلِهٖ وَسَلَّم عاشقانو! پۀ ښو ښو نيتونو د عمل ثواب زياتيږي۔ راځئ چې د بيان اوريدو نه مخكښې څۀ ښۀ ښۀ نِيَّتونه وكړئ: مَثَلاً * د الله پاک د رضا د پاره به ټول بيان اورم * پۀ اَدب به کښينم * ښۀ پۀ توجُّه به بيان اورم * څۀ چې واورم، د هغې به د يادولو، پخپله پرې د عمل کولو او نورو ته د رَسولو کوشش کووم۔

صَلُّو ْا عَلَي الْحَبيب!                                                                                              صَلَّي الله عَلٰي مُحَمَّد

کشتۍ يـې غاړې ته ولګيده ۔۔۔!!

يوه ډيره ښکلې واقعه واورئ! بيانولے شي چې څه کسانوپۀ سمندري جاز کښې سفر کولو۔ ناڅاپه تيزې هواګانې شروع شوې، جاز ټالۍ وهل شروع کړې، مسافر پۀ زړۀ کښې ويريدل، کلمه درود او دعاګانې وغيره لوستل شروع شول، زړونه پۀ تيزۍ سره درزيدل، د ټولو سره هم دا ويره وه چې آه! مونږ به د سمندر پۀ مينځ کښې ډوب شو او مړۀ به شو۔ يو اړخ ته خو پۀ جاز کښې داسې هله ګوله وه، بل خوا يو مَجذوب (يعنې د الله پاک پۀ عشق کښې ډوب) بزرګ د هر څيز نه بے نيازه د جاز پۀ ګوټ کښې پۀ ارام اودۀ وو۔ يو مسافر چې کله هغه وليدلو نو ورنزدې شو، هغوئي يـې وړقولو، ناڅاپه چې يـې سترګې وغړيدلې نو هغوئي پۀ تادۍ سره ووئيل:

بِسْمِ اللہِ الَّذِیْ لَا یَضُرُّ مَعَ اسْمِہٖ شَیْءٌ فِی الْاَرْضِ وَ لَا فِیْ السَّمَاءِ وَہُوَ السَّمِیْعُ الْعَلِیْمُ

ترجمه: د الله پاک پۀ نوم سره، د چا د نوم پۀ برکت سره چې پۀ زمکه او اسمان کښې هيڅ څيز هم نقصان نۀ رسوي او هُم هغه اوريدونکے او پوهه دے.