اللہ پاک ہمیں بھی یقین کی پختگی نصیب فرمائے۔ اللہ پاک پر کامِل بھروسا ہو، اس پر ایمان و یقین ہو، اِنْ شَآءَ اللہ الْکَرِیْم! اس کی مدد ہمارے شامِلِ حال رہے گی۔

(2):صبر

مددِ اِلٰہی پانے کا دوسرا سبب صبر ہے۔ اللہ پاک فرماتا ہے:

اِنَّ اللّٰهَ مَعَ الصّٰبِرِیْنَ(۱۵۳) (پارہ:2، سورۂ بقرہ:153)

تَرجَمۂ کَنزالْعِرفَان:بیشک اللہ صابروں کے ساتھ ہے۔

ہمارے ہاں نا لوگ جلدی مچانا شروع کر دیتے ہیں *میں نے بڑی کوششیں کر دیکھیں، کوئی نتیجہ نہیں نکلتا *بہت دُعائیں مانگ چُکا ہوں، کچھ ہاتھ نہیں آیا۔

یُوں جلدی نہیں مچانی چاہیے۔ بہت دفعہ ایسا ہوتا ہے کہ اللہ پاک کی مدد فورًا نہیں آتی، پہلے ہمارے صبر کا امتحان ہوتا ہے، جب ہم خُوب صبر کا مُظاہَرہ کر چکتے ہیں، تب اللہ پاک کی مدد آتی ہے اور کامیابیاں ہماری جھولی میں ڈال دی جاتی ہیں۔  آپ حضرت یُوسُف  علیہ السَّلام  کاواقعہ ہی دیکھ لیجیے!  حضرت یُوسُف  علیہ السَّلام  کو بچپن ہی میں خواب کے ذریعے آپ کا مَقام دکھا دیاگیا کہ 11 ستارے، چاند اور سُورج آپ کے حُضُور سجدہ ریز ہیں۔ مگر اس مقام تک پہنچنے کے لیے آپ نے کتنا صبر کیا... *کِنْعَان کا کنواں *مِصْر کا بازار *پِھر سالہا سال کی قیدِ ناحق *ماں باپ اور بہن بھائیوں کی لمبی جُدائی...اتنے طویل صبر کے بعد آپ کو وہ عروج مِلا کہ پُورا مِصْر آپ کا غُلام اور آپ سب کے آقا ہو گئے۔ لہٰذا صبر کیجیے! اللہ پاک کی مدد ضرور پہنچ کر رہے گی۔